Goa Accident News : तामिळनाडू वालंकिणी येथील सायबिणीचे दर्शन घेऊन गोव्यात येताना एका मिनी बसचा भीषण अपघात झाल्याची घटना घडली आहे.

धारवाड- गोवा मार्गांवरील रामनगर नजीक असलेल्या कुंभार्डा येथे रस्त्याच्या बाजूला असलेल्या झाडाला मिनी बसने धडक दिल्याने हा अपघात घडला.

या अपघाताची माहिती मिळताच पोलिस घटनास्थळी दाखल झाले. अपघातात गोव्यातील सात भाविक जखमी झाले आहेत तर एका भाविकाची प्रकृती चिंताजनक असल्याचे समजते.

याबाबत अधिक माहिती अशी की, जी ए 03 व्ही 0289 या क्रमांकाच्या मिनी बस वाहनातून 10 जण तामिळनाडू येथील वालंकीणी येथे दर्शनासाठी गेले होते. वालंकीणी येथून गोव्याच्या दिशेने येत असताना भाविकांचे वाहन धारवाड- गोवा मार्गांवरील रामनगर नजीक असलेल्या कुंभार्डा येथे आले.

यावेळी चालकाचे वाहनावरील नियंत्रण सुटल्याने मिनी बसने रस्त्याच्या बाजूला असलेल्या झाडाला धडक दिली. हा अपघात गुरुवारी पहाटे साडे पाचच्यासुमारास घडला. अपघातात गोव्यातील सात भाविक जखमी झाले आहेत. त्यांच्यावर बेळगाव येथील केएलई हॉस्पिटलमध्ये उपचार सुरु आहेत.

त्यापैकी एक भाविकाची प्रकृती चिंताजनक असल्याचे समजते. म्हापसा येथील टोजेंटा परेरा (15), इझाबेल फर्नांडीस (40), जीन परेरा (45), मालीन फर्नांडीस (8), जॉन्सन फर्नांडीस (3) व जेनुस्टा परेरा (17) जखमी झाले आहेत तर जॉन फर्नांडीस (38) हे गंभीर जखमी झाले आहेत. जखमीमध्ये 4 मुलांचा समावेश आहे.