वास्को: बोगमाळोहून दाभोळीच्या दिशेने जाताना एक पर्यटक बस (Bus) दुपारी रस्त्याच्या कडेला कलंडल्याने या बसमधील 40 प्रवासी (Passengers) जखमी झाले. यात चार जणांना गंभीर स्वरूपाची जखम झाली. जखमी पर्यटक छत्तीसगड येथील असून ते गोव्यात (Goa) बोगमाळो येथे पर्यटनास आले होते.

मिळालेल्या माहितीनुसार, आज दुपारी पर्यटक बस जीए 08-व्ही-1789 सुमारे 40 पर्यटकांना घेऊन बोगमाळो समुद्र किनाऱ्यावर आली होती. समुद्र किनारी पर्यटकांनी पर्यटनाचा आस्वाद घेतल्यानंतर ती बस पर्यटकांना घेऊन परत बोगमाळो मार्गे दाभोळीच्या दिशेने जात असताना येथील चर्च (Church) जवळ एका वळणावर बस चालकाचा बसवरील ताबा सुटल्याने त्याने करकचून ब्रेक मारला असता बस एका बाजूला रस्त्याच्या कडेला कलंडली. बाहेर मोठा आवाज झाल्याने या भागातील लोकांनी पाहिले असता बस आडवी झालेली पाहण्यात आली.

स्थानिक लोकांनी तातडीने घटनास्थळी धाव घेऊन बसमधील प्रवाशांना बाहेर काढण्यास सुरुवात केली. या बसमध्ये एकूण ४० पर्यटक प्रवासी होते. तसेच घटनास्थळी पोलिस तसेच अग्निशमन दल दाखल झाले व त्यांनी अपघातात (Accident) जखमी झालेल्या प्रवाशांना मदत केली. जखमींना तातडीने चिखली येथील उपजिल्हा इस्पितळात दाखल करण्यात आले. जखमींपैकी चार पर्यटकाना गंभीर स्वरूपाची जखम झाली असून, या सर्व जखमींवर चिखली येथील उपजिल्हा इस्पितळात उपचार सुरू आहेत.