पणजी : रायबंदर बायपास मार्गावर रविवारी रात्री उशिरा सरकारी वाहनाची दोन दुचाकींना धडक बसली. या अपघातात सांताक्रूझ येथील पुष्पलता स्वामी या महिलेचा जागीच मृत्यू झाला आहे. तर दुचाकीवरील अन्य दोघेजण गंभीर जखमी झाले आहेत. त्यांना गोमेकॉ इस्पितळात उपचारासाठी दाखल करण्यात आले आहे.

जुने गोवे (Old Goa) पोलिसांनी दिलेल्या माहितीनुसार, सरकारी वाहनाची दुचाकींना जोरदार धडक बसल्याने एका दुचाकीवरील मागे बसलेली महिला खाली पडली व तिच्या डोक्याला गंभीर दुखापत झाली. मोठ्या प्रमाणात रक्तस्राव झाल्याने तिचे निधन झाले. दुचाकीवरील अन्य दोघे दुचाकीस्वार गंभीर जखमी झाल्याने त्यांना रुग्णवाहिकेने गोमेकॉ (GMC) इस्पितळात उपचारासाठी दाखल करण्यात आले आहे.

दरम्यान या अपघाताचं कारण अद्याप समजू शकलेलं नाही. मात्र ही धडक इकती जोरदार होती, की एका महिलेचा जागीच मृत्यू झाला आहे. या अपघातप्रकरणी (Accident) गुन्हा दाखल करण्यात आला असून पुढील तपास पोलिस करत आहेत. गोव्यात वाढलेल्या अपघातांची संख्या पाहता नवीन मोटार वाहन कायदा लागू करण्यात आला आहे. मात्र असं असलं तरीही गोव्यात अपघात सुरुच असल्याचं चित्र आहे.