Mapausa Car Bike Accident

बार्देश: हाऊसिंग बोर्ड-म्हापसा येथील एका वळणावर आज बुधवारी दुपारी अडीचच्‍या सुमारास झालेल्‍या अपघातात वडील व मुलगा जखमी झाला. त्‍यांना उपचारांसाठी इस्‍पितळात दाखल करण्‍यात आले आहे.

मिळालेल्‍या माहितीनुसार, इनोव्‍हा कार (केए १८ एम ८५४५) पुढे जात असलेल्या हिरो होंडा मोटरसायकलला जोरदार धडक दिली. यात दुचाकीस्‍वार व त्‍यांच्‍या मागे बसलेला त्‍यांचा मुलगा जखमी झाला. दोन्‍ही वाहने शिवोलीहून म्हापशाच्‍या दिशेने येत होती.

कारने दुचाकीला दिलेली धडक एवढी जोरदार होती की वडील व मुलगा रस्त्याच्या बाजूला फेकले गेले. त्‍यात वडिलांच्या हाताला तर मुलाच्या नाकाला मार बसला. तेथील लोकांनी धाव घेऊन दोघांनाही उठविले आणि नंतर म्हापसा येथील जिल्हा इस्पितळात दाखल केले. कारचालक नशेत असल्‍याचे समजते. दुचाकीचे मोठे नुकसान झाले. अधिक तपास सुरू आहे.