पणजी: आम आदमी पक्षाचे (आप) राष्ट्रीय संयोजक आणि दिल्लीचे माजी मुख्यमंत्री अरविंद केजरीवाल शुक्रवारी (ता.३) रात्री ९.१० मिनिटांनी गोव्यात दाखल झाले. शुक्रवार ३ ते रविवार ५ ऑक्टोबर असे तीन दिवस त्यांचा गोवा दौरा राहणार आहे. दाबोळी विमानतळावर त्यांचे गोवा प्रभारी आतिषी, गोवा प्रदेशाध्यक्ष अमित पालेकर, आमदार व्हेन्झी व्हिएगस, आमदार क्रूझ सिल्वा यांच्यासह पदाधिकाऱ्यांनी स्वागत केले.

केजरीवाल यांचा हा तीन दिवसांचा दौरा पक्षाच्या संघटनात्मक बैठका आणि नवीन कार्यालयाच्या उद्‌घाटनावर केंद्रीत असणार आहे. शनिवार, ४ रोजी सकाळी ११ वा. ते मये येथील कार्यालयाचे उद्‌घाटन करतील.

दुपारी ३.३० वा. दक्षिण गोव्यातील स्वयंसेवकांबरोबर कुडतरी येथे बैठक होईल. रविवार, ५ रोजी दुपारी ३.३० वा. उत्तर गोव्यातील स्वयंसेवकांबरोबर केजरीवालांची म्हापसा येथे बैठक होईल. या तीन दिवसांच्या दौऱ्यात केजरीवाल हे पक्षाच्या स्वयंसेवकांशी संवाद साधून आगामी स्थानिक स्वराज्य संस्थांच्या निवडणुका आणि संघटनात्मक तयारीचा आढावा घेतील. दरम्यान, काँग्रेसचे अमित पाटकर, गिरीश चोडणकर यांनी ‘आप’वर टीका केली.

राज्यातील जनतेचा भाजप आणि काँग्रेसवरील विश्वास उडाला आहे. दोन्ही पक्षांकडून राज्यातील जनतेला अजिबात आशा राहिलेल्या नाहीत. केवळ आम आदमी पक्षाकडून त्यांना आशा आहेत, त्यामुळे २०२७ मध्ये गोव्यात ‘आप’ स्वबळावर सरकार स्थापन करेल, असा आम्हाला विश्वास वाटतो.

- अरविंद केजरीवाल, राष्ट्रीय संयोजक, आम आदमी पक्ष