Fire News: नवावाडा तमसुली येथे काल (11 जानेवारी) रात्री 10.30 च्या सुमारास धनंजय च्यारी यांच्या फर्निचर वर्कशॉपला अचानक भीषण आग लागल्याची घटना घडली. त्यांचे हे वर्कशॉप आगीत जाळून खाक झाले आहे.

आगीमुळे वर्कशॉपमध्ये असलेले प्लायवूड तसेच अन्य लाकूड साठ्यासहित सर्व उपकरणे आगीच्या विळख्यात सापडली. घटनेची माहिती मिळताच, कुंडई अग्निशमन दलाने घटनास्थळी धाव घेवून स्थानिकांच्या मदतीने आग विझवण्यास सुरुवात केली.

वेळीच आग नियंत्रणात आणल्याने आजूबाजूच्या घरांना आगीची झळ पोहोचली नाही. कुंडई अग्निशमन दलाचे अधिकारी गणेश गोवेकर यांनी दिलेल्या माहितीनुसार, यामध्ये चार लाख रुपयांचे नुकसान झाले आहे.

दरम्यान, आगीचे कारण समजू शकले नाही. या घटनेतील महत्वाची बाब म्हणजे, वर्कशॉपमध्ये वीजजोडणी केलेली नाही. वर्कशॉपमध्ये कधी विजेची आवश्यकता असल्यास गरजेपुरते घरातील वीज कनेक्शन घेतले जायचे.

त्यामुळे ही आग कुणीतरी जणीवपूर्वक लावली असल्याचा संशय कुटुंबियांकडून व्यक्त केला जात आहे. पोलीस याबाबत अधिक तपास करत आहेत.