Goa Cricket Association लेगस्पिनर जय कांगुरी याने हॅटट्रिकसह टिपलेले सात गडी, तसेच आराध्य गोयल याच्या शानदार 82 धावांच्या बळावर द किंग्स स्कूलने गोवा क्रिकेट असोसिएशनच्या 16 वर्षांखालील मुलांच्या दिलीप सरदेसाई करंडक शालेय क्रिकेट स्पर्धेत दक्षिण विभागीय विजेतेपद मिळविले.

अंतिम सामन्यात त्यांनी वास्कोच्या सेंट जोसेफ इन्स्टिट्यूटवर सहा विकेट राखून मात केली. स्पर्धेतील अंतिम सामना शुक्रवारी मडगाव क्रिकेट क्लबच्या डॉ. राजेंद्र प्रसाद स्टेडियमवर झाला.

सेंट जोसेफ इन्स्टिट्यूटचा डाव 197 धावांत संपुष्टात आला. त्यांच्यातर्फे खिंड लढवताना द्विज पालयेकर याने सर्वाधिक 78 धावा केल्या. जय याने 35 धावांत 7 गडी टिपले.

द किंग्स स्कूलने 34 व्या षटकात विजेतेपदावर शिक्कामोर्तब करताना 4 बाद 198 धावा केल्या. आराध्य याने 95 चेंडूंत नऊ चौकारांच्या मदतीने 82 धावा केल्या. याशिवाय शमीक कामत याने 43 चेंडूंत सात चौकारांसह 49 धावा नोंदविल्या.

गोवा क्रिकेट असोसिएशनचे संयुक्त सचिव रुपेश नाईक, ज्युनियर क्रिकेट निवड समितीचे सदस्य महेंद्र नाईक, स्पर्धा समन्वयक अजित गावकर यांच्या उपस्थितीत बक्षीस वितरण झाले.

संक्षिप्त धावफलक

सेंट जोसेफ इन्स्टिट्यूट: 44.5 षटकांत सर्वबाद 197 (द्विज पालयेकर 78, सुजय परमेकर 30, प्रथमेश कदम 18, जय कांगुरी 7-35, व्यंकट चिगुरुपती 2-24, रुद्राक्ष मनचंदा 1-50) पराभूत

विरुद्ध द किंग्स स्कूल: 33.3 षटकांत 4 बाद 198 (आराध्य गोयल 82, शमीक कामत 49, जय कांगुरी 15, सार्थक शेटगावकर 2-34, सार्थक तोरसकर 1-37, शिवराज लकुंडी 1-18).