Bicholim News : डिचोली, संतुलीत हवामानामुळे यंदा डिचोलीत झेंडू फुलांचे मळे वेळेवर बहरले असून, यंदा दसरा सणात स्थानिक झेंडूची फुलांचा तुटवडा निर्माण होणार नसल्याचे स्पष्ट संकेत मिळाले आहेत.

कृषी खात्याच्या अधिकाऱ्यांनीही तसा विश्वास व्यक्त केला आहे. यंदा डिचोलीत झेंडू फुलांचा बहर वेळेवर आणि समाधानकारक आहे.

असे विभागीय कृषी कार्यालयाचे अधिकारी दीपक गडेकर यांनी सांगितले आहे. असंतुलित पावसामुळे गेल्या वर्षी झेंडू फुलांचा बहर लांबणीवर पडला होता. त्यामुळे ऐन दसऱ्यात स्थानिक झेंडू फुलांचा तुटवडा निर्माण झाला होता.

परिणामी गेल्यावर्षी ऐन दसरा सणात डिचोलीतील जनतेला कर्नाटक राज्यातून येणाऱ्या झेंडू फुलांवर अवलंबून रहावे लागले होते.

कृषी खात्याच्या सहकार्याने यंदा साळ, अडवलपाल, आमोणे आदी भागात मिळून डिचोलीत यंदा साडेतीन हेक्टर जमीन झेंडू लागवडीखाली आली आहे.

३० हून अधिक शेतकऱ्यांनी ही लागवड केली आहे. यंदाही स्थानिक नर्सरीत उगवलेली झेंडूची रोपटी शेतकऱ्यांना उपलब्ध करून देण्यात आली होती.

कर्नाटकातील फुले डिचोलीत

दसऱ्याला झेंडू फुलांना प्रचंड मागणी असते. त्यामुळे दरवर्षी कर्नाटक राज्यातून डिचोलीत प्रचंड प्रमाणात झेंडू फुलांची आवक होत असते.

दसरा जवळ आल्याने कर्नाटकातून डिचोलीत झेंडू फुलांची आवक सुरु झाली आहे. शनिवारी तर डिचोलीत मोठ्या प्रमाणात कर्नाटकातील झेंडू फुलांची आवक झाली होती.

शनिवारी सायंकाळपर्यंत ७० रुपये प्रति किलो, अशा प्रकारे झेंडू फुलांचे दर होते. मात्र सोमवारपर्यंत उपलब्ध होणाऱ्या झेंडू फुलांच्या उपलब्धतेवर झेंडू फुलांचे दर निश्चित होणार आहेत.