Goa Crime News:

थिवी येथे एका 18 वर्षीय युवतीचा आंघोळ करतेवेळी व्हिडिओ काढण्याचा प्रकार उघडकीस आला. याप्रकरणी कोलवाळ पोलिसांनी अज्ञात व्यक्तीविरुद्ध विनयभंगाचा गुन्हा नोंद केला आहे. उपलब्ध माहितीनुसार, ही घटना रविवार, १० मार्च रोजी सायंकाळी घडली.

पीडित युवती घरातील स्वच्छतागृहात आंघोळ करीत होती. त्यावेळी अज्ञात व्यक्तीने खिडकीतून तिचा मोबाईलवर व्हिडिओ काढला. याची चाहूल लागताच तिने आरडाओरडा केला. तेव्हा संशयिताने घटनास्थळावरून धूम ठोकली. मात्र, पळताना त्याचा मोबाईल घटनास्थळीच पडला. हा मोबाईल पोलिसांनी जप्त केला आहे.

युवतीचा आरडाओरडा ऐकून तिचे पालक आणि शेजारील लोक धावून आले. यावेळी संशयित लोकांच्या तावडीत सापडण्यापूर्वीच पळून जाण्यात यशस्वी ठरला.

या घटनेची माहिती मिळताच पोलिस घटनास्थळी दाखल झाले व त्यांनी आजूबाजूच्या परिसरात संशयिताचा शोध घेतला; पण तो सापडू शकला नाही. पीडितेच्या तक्रारीच्या आधारे पोलिसांनी भादंसंच्या ३५४ क कलमांन्वये अज्ञात संशयिताविरुद्ध विनयभंगाचा गुन्हा नोंद केला. पुढील तपास पोलिस निरीक्षक विजय राणे यांच्या मार्गदर्शनाखाली उपनिरीक्षक रोहन मडगावकर हे करीत आहेत.