Salcete News: राज्यात मोठ्या प्रमाणात भाजीपाला हा परराज्यातून म्हणजेच गोव्याशेजारील कर्नाटक आणि महाराष्ट्रातील विविध भागातून आयात केला जातो. परंतु राज्यात रब्बी आणि खरीप हंगाम मिळून भाजीपाला लागवडीखाली सर्वाधिक म्हणजे २६४५ हेक्टर क्षेत्रफळ हे सासष्टी तालुक्यातील आहे. त्यामुळे साहजिकच सर्वाधिक भाजीपाल्याचे उत्पादनही सासष्टीतच घेतले जाते.

राज्यात कांदा, टॉमेटो आणि बटाटा याचे पीक घेतले जात नाही. त्यामुळे त्यांच्यासाठी इतर राज्यांवर अवलंबून राहावे लागते, परंतु इतर विविध प्रकारच्या पालेभाज्या तसेच फळभाज्यांचे उत्पादन राज्यात ग्रामीण भागातील शेतकरी घेतात. गोव्यात गेल्यावर्षी म्हणजे वर्ष २०२३-२४ आर्थिक वर्षात खरीप आणि रब्बी हंगाम मिळून एकूण ८६८९ हेक्टर क्षेत्रफळात भाजीपाल्याचे उत्पादन घेण्यात आले.

राज्यात एकूण ११४५३५ टन इतक्या भाजीपाल्याचे उत्पादन घेण्यात आले. राज्यात खरीप हंगामात ३१०४ हेक्टर क्षेत्रफळ लागवडीखाली होते, त्यातून ३२९६१ टन उत्पादन घेण्यात आले तर रब्बी हंगामात ५५८५ हेक्टर क्षेत्रफळ लागवडीखाली होते, त्यातून ८१५७४ टन उत्पादन घेण्यात आल्याचे कृषी संचालनालयाच्या अहवालात नमूद करण्यात आले आहे.

राज्यात रब्बी आणि खरीप हंगाम मिळून भाजीपाला लागवडीखाली सर्वाधिक म्हणजे २६४५ हेक्टर क्षेत्रफळ हे सासष्टी (Salcete) तालुक्यातील आहे. त्यामुळे साहजिकच सर्वाधिक भाजीपाल्याचे उत्पादनही सासष्टीतच घेतले जाते. सासष्टीत एकूण ३१३१८ टन इतके भाजीचे उत्पादन घेण्यात आले.

परंतु सर्वात कमी १६२ हेक्टर भाजीपाला लागड क्षेत्रफळ धारबांदोडा तालुक्यात आहे. परंतु सर्वात कमी उत्पादन मात्र सांगे तालुक्यात नोंदवण्यात आले आहे. सांगे तालुक्यात १९६० टन इतक्या सर्वात कमी भाजीपाला उत्पादनाची नोंद करण्यात आली आहे.