Indians Surrendered Passports: मागील दहा वर्षात जवळपास 70,000 भारतीयांनी त्यांच्या पासपोर्टचे समर्पण केले आहे. यामध्ये गोवा, पंजाब, गुजरात, महाराष्ट्र, केरळ, तामिळनाडू, दिल्ली आणि चंदीगड या आठ राज्यांचे प्रमाण 90 टक्के आहे. 2011 ते 2022 दरम्यान प्रादेशिक पासपोर्ट कार्यालयांमध्ये (RPOs) पासपोर्ट समर्पण केले.

इंडियन एक्स्प्रेसने माहितीच्या अधिकाराअंतर्गत केलेल्या अर्जाला (RTI) उत्तर देताना परराष्ट्र मंत्रालयाने (MEA) ही माहिती दिली आहे.

मागील दहा वर्षात आत्मसमर्पण केलेल्या 69,303 पासपोर्टपैकी सर्वाधिक 40.45 टक्के पासपोर्ट गोव्याच्या आरपीओमध्ये करण्यात आले आहेत.

आरटीआय कायद्यांतर्गत समोर आलेल्या माहितीत केवळ प्रादेशिक पासपोर्ट कार्यालयाकडे हस्तांतरित केलेले पासपोर्ट समाविष्ट असून, यात परदेशातील भारतीय दूतावास आणि उच्चायुक्तालयांमध्ये समर्पण केलेल्या पासपोर्टचा समावेश नाही.

भारतीय नागरिकत्व कायदा, 1955 अंतर्गत, भारतीय वंशाच्या व्यक्तींना दुहेरी नागरिकत्वाची परवानगी नाही. जर एखाद्या व्यक्तीकडे भारतीय पासपोर्ट असेल आणि त्याने दुसर्‍या देशाचा पासपोर्ट घेतला असेल, तर त्यांनी ताबडतोब भारतीय पासपोर्ट सरेंडर करायला हवा असे कायदा सांगतो.

परराष्ट्र मंत्रालयातील राज्यमंत्री व्ही. मुरलीधरन यांनी या वर्षी 24 मार्च रोजी संसदेत सामायिक केलेल्या माहितीनुसार, 2011 ते गेल्या वर्षी 31 ऑक्टोबर दरम्यान, 16.21 लाख भारतीयांनी त्यांचे नागरिकत्व सोडले होते.

आत्मसमर्पण केलेल्या 69,303 पासपोर्टपैकी, गोव्यातील सर्वाधिक लोकांचा समावेश आहे. त्यानंतर पंजाब मधील लोकांनी सर्वाधिक पासपोर्ट समर्पित केले आहेत. गोव्यातून 28,031 (40.45 टक्के) तर पंजाब (चंदीगडच्या केंद्रशासित प्रदेशासह) जालंधर आणि चंदीगडच्या आरपीओमध्ये 9,557 पासपोर्ट (13.79 टक्के) समर्पण करण्यात आले.