पणजी : मेरशीतील एका व्यक्तीचं अपहरण केल्याप्रकरणी ओल्ड गोवा पोलिसांनी तब्बल 7 जणांना बेड्या ठोकल्या आहेत. धक्कादायक बाब म्हणजे यात त्या व्यक्तीच्या पत्नीचा हात असल्याचं उघड झालं आहे. विनायक देसाई असं या इसमाचं नाव असून जागेच्या वादातून हे अपहरणनाट्य रंगल्याचं चित्र आहे.

मेरशी कुंभारवाडा परिसरात राहणाऱ्या विनायक देसाई या 63 वर्षीय व्यक्तीचं मंगळवारी अपहरण करण्यात आलं होतं. देसाई यांना आरोपींनी दोना पावला येथील एका फ्लॅटमध्ये कोंडून ठेवण्यात आलं होतं. मंगळवारी रात्री उशिरा ओल्ड गोवा (Old Goa) पोलिसांनी देसाई यांची सुटका करुन आरोपींना बेड्या ठोकल्या. आपल्या पत्नीसह सहा जणांनी अपहरण केल्याचा खुलासा पीडित विनायक देसाई यांनी केला आहे. जमीनविषयक आणि वैवाहिक वादातून अपहरण झाल्याची तक्रार देसाई यांनी दाखल केली आहे.

मंगळवारी रात्री पावणेदहाच्या सुमारास मेरशी परिसरातून देसाई यांचं अपहरण (Kidnap) करण्यात आलं होतं. महत्त्वाची बाब म्हणजे अपहरणासाठी आरोपींनी देसाई यांचीच कार वापरली होती. यानंतर आरोपींनी देसाई यांना साखळीने बांधलं आणि दोना पावलामध्ये एका बंद फ्लॅटमध्ये कोंडून ठेवलं. देसाई यांना मारहाण झाल्याचंही पोलिसांनी (Police) स्पष्ट केलं आहे. देसाईंचं अपहरण होताना पाहून एका प्रत्यक्षदर्शीने पोलिसांना याची माहिती दिली आणि पोलिसांनी त्यांची सुटका केली आहे. आरोपींना सध्या पोलीस कोठडीत ठेवण्यात आलं असून त्यांच्यावर विविध कलमाखाली गुन्हे दाखल करण्यात आले आहेत.