गोव्यातील वाढते अवैध धंदे आणि गुन्हे यामध्ये परदेशी नागरिकांचा सहभाग ही राज्यासाठी चिंतेची बाब आहे. याबाबत सरकार गंभीर असून याविरोधात सक्त कारवाई केली जात आहे. गोव्यातून बेकायदेशीपणे राहणाऱ्या आणि विविध गुन्ह्यात सहभाग अढळून आलेल्या 650 परदेशी नागरिकांची राज्यातून हकालपट्टी करण्यात आली आहे. अशी माहिती राज्याचे मुख्यमंत्री प्रमोद सावंत यांनी दिली आहे.

(650 Foreigners staying without valid documents and involved in Crime in Goa are Deported)

"राज्यात वैध कागदपत्रे नसताना राहणाऱ्या तसेच विविध गुन्ह्यात सहभागी परदेशी नागरिकांची आम्ही माहिती घेत आहोत. अशा 700 नागरिकांची माहिती मिळाली असून, त्यापैकी 650 परदेशी नागरिकांची त्यांच्या मूळ देशात हकालपट्टी करण्यात आली आहे." अशी माहिती मुख्यमंत्री प्रमोद सावंत यांनी दिली आहे. "नाताळ आणि नववर्षाचे स्वागत या पार्श्वभूमीवर राज्यात विविध बिचवर मदत केंद्र उभारली जातील. तसेच, पोलिस नाकाबंदी देखील करणार आहेत." असे सावंत म्हणाले.

राज्यात डान्सबार नाहीतच!

राज्यात अवैध पद्धतीने डान्सबार सुरू असल्याचा वारंवार आरोप केला जातो. यावर प्रतिक्रिया देताना राज्यात डान्सबार नाहीतच असे उत्तर त्यांनी दिले आहे. राज्यात कुठेही अवैध डान्सबार आढळून आल्यास तात्काळ पोलिसांना माहिती द्यावी असे मुख्यमंत्री सावंत म्हणाले. पर्यटकांना सहकार्य करण्यासाठी गाईड्स यांची नियुक्ती केली जाणार आहे. पर्यटन हंगामात पर्यटकांना मदत करण्यासाठी पोलिस तसेच होम गार्ड सदैव तत्पर असतील असेही सावंत म्हणाले.