पणजी :राज्‍यातील पर्यटन क्षेत्राच्‍या वाढीसाठी २०२१-२२ मध्ये ५३ कोटी ५४ लाख रुपयांची तरतूद केली असून, हा सर्व निधीवाटप झाला आसून.त्यापैकी 11 कोटी 66 लाख रुपये खर्च करण्यात आले आहे. तर 41 कोटी 87 लाख रुपये शिल्लक असल्‍याचे लेखी उत्तर पर्यटनमंत्री रोहन खंवटे (Rohan Khaunte) यांनी सभागृहात दिले.

आमदार वेन्‍झी व्हिएगस (VENZY VIEGAS) यांनी याबाबतचा अतारांकित प्रश्‍न विचारला होता. पर्यटनाच्‍या विकासासाठी 2020-21 मध्ये 62 कोटी 68 लाख रुपयांची तरतूद करण्यात आली होती. सर्व निधीवाटप झाले आहेत. पैकी 30 कोटी 87 लाख रुपये खर्च झाले आणि 31 कोटी 80 लाख रुपये शिल्लक राहिल्‍याचे या उत्तरात म्‍हटले आहे.कोरोनामुळे राज्‍यात येणाऱ्या विदेशी पर्यटकांची संख्या रोडावली असल्‍याचे पर्यटनमंत्र्यांनी दिलेल्‍या उत्तरात म्‍हटले आहे.

2019 मध्ये राज्‍यात सुमारे 9 लाख 37 हजार 113 विदेशी नागरिक आले होते; तर 2020 मध्ये यात घट होऊन ती तब्बल 3 लाख 193 इतकी खाली आल्‍याचे लेखी उत्तरात म्‍हटले आहे. 2021 मध्ये यात आणखी घट होऊन ती 22 हजार 128 इतकी रोडावल्‍याचे स्‍पष्ट झाले आहे. 2021 मध्ये युकेमधून ३ हजार 166 पर्यटक आले. जर्मनीमधून 656, युक्रेनमधून 91,फिनलँडमधून 91,फ्रान्‍समधून 589,इराणमधून 34,स्‍विझर्लंडमधून 89,युएईमधून 149,पोर्तुगालमधून 3,कॅनडाहून 269,अमेरिकेतून 2039,ऑस्‍टेलियामधून 122,इटलीतून 38,कझागिस्‍तानमधून 398 तर अन्‍य देशांतून 13 हजार 4 पर्यटक गोव्‍यात दाखल झाल्‍याची माहिती खंवटे यांनी दिली आहे.

ग्रामीण भागात 61 कोटींची विकासकामे

राज्‍यातील ग्रामीण भागातील पर्यटनवाढीसाठी सुमारे 61 कोटी 52 लाख 92 हजार रुपयांची विकासकामे करण्यात येणार आहेत. त्यातील काही कामे सुरू असून, काही कामांच्‍या निविदा काढणे बाकी असल्‍याचे लेखी उत्तर पर्यटनमंत्री रोहन खवंटे यांनी सभागृहात दिले. मुरगावचे आमदार संकल्‍प आमोणकर यांनी याबाबतचा अतारांकित प्रश्‍न विचारला होता.