Goa Job Fair: गोव्यात आयोजित दोन दिवसीय रोजगार मेळाव्यात 500 युवकांना रोजगार मिळाला आहे. तर, तब्बल 4,800 जण शॉर्टलिस्ट झाले आहेत. गोवा सरकारतर्फे आयोजित या रोजगार मेळाव्यासाठी तब्बल 21 हजार युवकांनी नोंदणी केली होती. अशी माहिती रोजगार आणि कामगार आयुक्त राजू गवस यांनी दिली आहे. आयटी, वैद्यकीय, फार्मा यासह विविध क्षेत्रातील कंपन्यांनी या रोजगार मेळाव्यात उपस्थिती लावली होती.

पहिल्या दिवशी मेगा जॉब फेअरसाठी 4,658 उमेदवारांनी हजेरी लावली होती. त्यापैकी 273 जणांना नोकरी मिळाली तर, 3,235 जण शॉर्टलिस्ट झाले होते. तर पहिल्यादिवशी 1,097 जण पहिल्या किंवा दुसऱ्या फेरीतून बाहेर पडले होते. गवस यांनी दिलेल्या माहितीनुसार, दुसऱ्या दिवशी युवकांना रोजगार मिळाला असून, त्यांना नियुक्तीपत्र देण्यात आले आहे. दरम्यान, दहा हजार जण वेगवेगळ्या फेरीतून बाद झाले आहेत. तसेच, ही आकडेवारी अंतिम नसल्याचे त्यांनी म्हटले आहे.

राज्य सरकारने आयोजित केलेल्या दोन दिवसीय रोजगार मेळाव्यात दीडशेहून अधिक कंपन्या सहभागी झाल्या होत्या. खासगी क्षेत्रातील एकूण चार हजारहूंन अधिक नोकऱ्या या मेळाव्याद्वारे गोमंतकीयांना देण्याचे उद्दिष्ट सरकारटचे आहे.