Anjuna Loud Music Issue

पणजी: ध्वनी प्रदूषणासंदर्भात अधिकाधिक तक्रारी दाखल झालेल्या हणजूण येथील पाच रेस्टॉरंट्स व पब्सना मुंबई उच्च न्यायालयाच्या गोवा खंडपीठाने प्रतिवादी करून नोटिसा बजावल्या होत्या. त्यापैकी तिघांनी आज प्रतिज्ञापत्र सादर केले.

प्रदूषण देखरेख यंत्रणा बसवण्यात आल्याची माहिती दिली आहे. ही यंत्रणा बसवण्यासंदर्भात प्रदूषण नियंत्रण मंडळाने (Goa Pollution Control Board) वेळेची मर्यादा निश्‍चित न करता वेळोवेळी त्रुटी ठेवत असल्याबाबत खंडपीठाने (Goa Bench) अवमान याचिकेवरील सुनावणीवेळी नाराजी व्यक्त करण्याबरोबरच त्यांचा सविस्तर तपासणी अहवाल देण्यास सांगितले आहे. पहिल्या पाच जणांविरुद्ध ध्वनीसंदर्भात २५ ते ५० तक्रारी दाखल झाल्याने खंडपीठाने त्याची गंभीर दखल घेतली होती.

या पाचजणांपैकी तिघांनी सादर केलेल्या उत्तरात प्रदूषण नियंत्रण देखरेख यंत्रणा बसविली असून प्रदूषण नियंत्रण मंडळाने त्याची जेव्हा पाहिजे तेव्हा तपासणी करावी व कनेक्टिव्हीटी सुरू करावी अशी बाजू या रेस्टॉरंट्सच्यावतीने त्यांच्या वकिलांनी मांडली. खंडपीठाने या रेस्टॉरंट्स व पब्सने उभारलेल्या प्रदूषण देखरेख यंत्रणेबरोबरच तेथील भौगोलिक स्थितीचीही सविस्तर माहिती अहवाल सादर करण्याचे निर्देश खंडपीठाने दिले आहेत.

...परवानगी सक्तीची!

प्रदूषण नियंत्रण मंडळाने हणजूण भागातील रेस्टॉरंट्स व पब्सना कन्सेट टू ऑपरेट परवानी सक्तीची केली होती. या कन्सेट टू ऑपरेट नोटिशीबरोबर संबंधित रेस्टॉरंट्सनी प्रदूषण देखरेख यंत्रणा बसवण्याची दुरुस्ती अधिसूचना जारी केली होती. नोटिस बजावल्यापासून संबंधित रेस्टॉरंट्स व पब्सनी ही यंत्रणा बसवणे आवश्‍यक आहे, त्यासाठी वेळेच्या मर्यादेची आवश्‍यकत नाही. ज्या दिवशी नोटीस दिली, तेव्हापासून लगेच त्याची अंमलबजावणी होणे आवश्‍यकता आहे, अशी बाजू सरकारी वकिलांनी मांडली.