पणजी : ताळगाव येथील एका व्यक्तीचे अपहरण करुन खंडणी मागितल्याचा प्रकार उघडकीस आला आहे. रविवारी रात्री हा सर्व प्रकार घडल्याची माहिती आहे. पणजी पोलिसांना तपासाचं सुत्र वेगाने हलवत 5 संशयितांना बेड्या ठोकल्या आहेत.

ताळगावात राहणाऱ्या एका व्यक्तीचं रविवारी रात्री अपहरण करण्यात आलं होतं. अपहरणानंतर आरोपींनी त्याला करंजाळे येथील एका फ्लॅट मध्ये डांबून ठेवत मारहाण केल्याचीही माहिती आहे. यानंतर 70 लाखांची खंडणी मागण्याचा प्रकार घडला आहे. या प्रकरणी पणजी पोलिसांकडून 5 संशयितांना अटक करण्यात आली आहे. पोलिसांनी पुढील तपास सुरु केला आहे.

दरम्यान काही दिवसांपूर्वीच मेरशी कुंभारवाडा परिसरात राहणाऱ्या विनायक देसाई या 63 वर्षीय व्यक्तीचं अपहरण करण्यात आलं होतं. देसाई यांना आरोपींनी दोना पावला येथील एका फ्लॅटमध्ये कोंडून ठेवण्यात आलं होतं. रात्री उशिरा ओल्ड गोवा (Old Goa) पोलिसांनी देसाई यांची सुटका करुन आरोपींना बेड्या ठोकल्या. आपल्या पत्नीसह सहा जणांनी अपहरण केल्याचा खुलासा पीडित विनायक देसाई यांनी केला होता. जमीनविषयक आणि वैवाहिक वादातून अपहरण झाल्याची तक्रार देसाई यांनी दाखल केली होती.