Panjim Fest: पणजीतील मेरी इमॅक्युलेट चर्चचे नुकतेच फेस्त पार पडले. या फेस्तनिमित्त शहरात खाजे, फुटाणे-शेंगदाणे आणि इतर वस्तूंच्या स्टॉल्सची फेरी लावण्यात आली होती. त्या फेरीतून महानगरपालिकेच्या तिजोरीत 47 लाख रुपयांचा निधी आल्याची माहिती आयुक्त क्लेन मदेरा यांनी ‘गोमन्तक’ला दिली.

महानगरपालिकेला फेस्ताच्या माध्यमातून गतवर्षी 16 लाखांचा निधी आला होता. परंतु यावेळी तो 47 लाखांवर पोहोचला. नऊ दिवसांच्यावर ही फेरी ठेवण्यात आली. महत्त्वाची बाब म्हणजे व्यावसायिकांच्या विनंतीवरून मांडवी किनारी पदपथावरील दुकानांना तीन दिवस अधिक मुदत वाढवून दिली. त्यातून तीन दिवसांचा महसूल महानगरपालिकेला मिळाला.

यापूर्वी गणेशोत्सवाच्या वेळी भरणाऱ्या अष्टमीच्या फेरीत महानगरपालिकेला 90 लाखांचा महसूल मिळाला होता. मागील काही वर्षांपूर्वी महानगरपालिकेला फेरीतून मिळणारा निधी पाहिला तर तोही 12-13 किंवा 13-14 लाख असा राहिला होता, असेही आयुक्त म्हणाले. सध्या महानगरपालिकेला दररोजची महसूल प्राप्ती सोपो करातून होते.