Margao Crime News: शनिवारी (27 जानेवारी) मडगावातील गांधी मार्केटमध्ये तीन वर्षांची बेवारस मुलगी पोलिसांना सापडली. त्यानंतर तिच्या अज्ञात पालकांचा शोध घेणे सुरू होते. त्याबाबत आता एक महत्वाची माहिती समोर आली आहे.

जी तीन वर्षांची मुलगी सापडली होती, तिला एका अज्ञात जोडप्यानेच तिथेच आणून सोडले असल्याचे स्पष्ट झाले आहे.

त्यापूर्वी त्याच जोडप्याने एका दोन वर्षांच्या मुलाला मडगाव रेल्वे स्टेशनवर सोडून दिले होते, ही बाब पुढे आली आहे. ही लहान मुलगी सापडल्यानंतर बायलांचो एकवटोच्या अध्यक्ष ऑडा व्हिएगस यांनी ही बाब पोलिसांच्या निदर्शनास आणून दिली आणि याबाबत कसून चौकशी करण्याची विनंती केली होती.

त्यामुळे ही दोन्ही मुले बहीण भाऊ असावीत आणि त्यांच्या आई-वडिलांनीच त्यांना असे उघड्यावर सोडले असावे, असा तर्क व्यक्त करण्यात येत आहे.

मडगाव रेल्वे स्थानकावर शनिवारी आरपीएफ पोलिसांना दोन वर्षाचा मुलगा सापडला होता. या मुलाला ते जोडपे सोडून जात असल्याचे दृश्य सीसीटीव्हीत कैद झाले आहे. हे जोडपे शनिवारी नेत्रावतीने मडगावात आले. जोडपे कुठून दाखल झाले, हे समजले नाही. मडगाव पोलिस जोडप्याचा शोध घेत आहे. सध्या त्या मुलांना जिल्हा बाल कल्याण समितीकडे दिले आहे. याबाबत पोलीस आता अधिक तपास करत आहेत.