Robbery in Ponda : फोंडा पोलिस स्थानकाच्या हद्दीत काल बुधवारी रात्री तीन चोऱ्या झाल्या असून तिन्ही चोर्‍यामध्ये एकाच टोळक्याचा हात आहे का अशी चर्चा सध्या तालुक्यात सुरु आहे. खांडोळा - माशेल येथील गणपती मंदिर तसेच कुंकळ्ये येथे दुकान फोडीचा अयशस्वी प्रयत्न झाला मात्र झटापटीत दुकानदार जखमी झाला.

तिसरी मोठी चोरी तिस्क - उसगाव येथे झाली असून चोरट्यांनी एचडीएफसी आणि कॅनरा बँक अशा दोन बँकांची एटीएम रात्री पळवली. चोरट्यांनी जवळच असलेल्या कुळण येथे रस्त्याच्या कडेला असलेल्या निर्मनुष्य ठिकाणी ही एटीएम फोडली. दोन्ही एटीएम मधून किती पैसे पळवले ते समजू शकले नाही. कुंकळ्ये - म्हार्दोळ नारायणवाडा येथे रात्री एका दुकानात शिरुन चोरीचा अयशस्वी प्रयत्न केला मात्र दुकानदाराला संशय आल्याने त्याने धाव घेतल्याने चोरट्यांनी फ्रीजमधील बाटल्यांचा मारा त्याच्यावर केला.

या हल्ल्यात दुकानदार गुरुदास सदाशिव कुर्टीकर वय 52 जखमी झाले. त्यांना इस्पितळात नेण्यात आले. दुकानदाराने आरडाओरड केल्याने चोरटे दोन दुचाक्या सोडून पळाले. फोंडा पोलिसांनी दुचाक्या ताब्यात घेतल्या असून पुढील चौकशी सुरु आहे.