Three Traffic Police Suspended For Misbehaving With Tourists In Goa

पणजी: पर्यटक चालकांशी गैरवर्तन केल्याप्रकरणी हणजूण वाहतूक पोलिस कक्षाच्या तिघा पोलिस कर्मचाऱ्यांना निलंबित करण्यात आले आहे. त्यांच्या निलंबनाचा हा आदेश आज वाहतूक पोलिस अधीक्षक प्रबोध शिरवईकर यांनी काढला. याप्रकरणी त्यांची पोलिस खात्यांतर्गत चौकशी होणार आहे. नियमांचे पालन न करणाऱ्या व गैरवर्तन करणाऱ्या पोलिसांची गय केली जाणार नाही, असे शिरवईकर यांनी सांगितले.

निलंबित वाहतूक पोलिस कर्मचाऱ्यांमध्ये साहाय्यक उपनिरीक्षक मोहन चोपडेकर, हवालदार गोविंद मांद्रेकर, कॉन्स्टेबल प्रशांत शेट्ये यांचा समावेश आहे. या तिघांनी ड्युटीवर असताना पर्यटकांशी गैरवर्तन केल्याची तक्रार वरिष्ठ अधिकाऱ्यांकडे आली होती.

पर्यटकांना विनाकारण विविध प्रश्‍न विचारून त्यांची नाहक सतावणूक केली होती. वरिष्ठांकडे आलेल्या तक्रारीची प्राथमिक चौकशी केल्यानंतर या पोलिसांची वर्तणूक गैर असल्याचे आढळून आले होते. वाहनचालकांविरुद्ध कारवाई करताना मार्गदर्शक तत्त्वांचे उल्लंघन केले होते

तसेच बॉडीलाईन कॅमेरा रस्त्यावर असताना सुरू ठेवणे सक्तीचे आहे. मात्र, तो बंद होता. त्यामुळे पर्यटक व पोलिसांमध्ये झालेल्या संवादाची माहिती या कॅमेऱ्यामध्ये कैद झाली नव्हती. हा कॅमेरा बंद ठेवण्यामागील कारण हे पोलिस देऊ शकले नव्हते. नियमांचे पालन न करणाऱ्या तसेच पर्यटकांशी नाहक हुज्जत घालणाऱ्या वाहतूक पोलिसांविरुद्ध कठोर कारवाई केली जाईल, असा इशारा वरिष्ठ अधिकाऱ्यांनी दिला आहे.