पणजी: विधानसभा निवडणुकासाठीच्या उमेदवारी याद्यांचे वेध सर्वांनाच लागले असून कल काँग्रेस, आम आदमी पक्ष आणि तृणमूल काँग्रेस यांनी तब्बल 27 उमेदवारांची घोषणा केली आहे. काँग्रेसची ही तिसरी यादी असून आपची चौथी यादी आहे. तर तृणमूलने पहिल्यांदाच आपले उमेदवार रिंगणात उतरवले आहेत. याशिवाय रिव्होल्युशनरी गोवन्स आणि गोवा फॉरवर्ड पक्षानेही उमेदवार जाहीर केले आहेत. सत्ताधारी भाजप आणि मगो पक्षाकडून मात्र अद्याप उमेदवारांची घोषणा झालेली नाही. भाजपची यादी कोणत्याही क्षणी जाहीर होण्याची शक्यता आहे. (27 candidates from 3 parties for Goa elections)

काँग्रेसने (Goa Congress) आपल्या दुसऱ्या यादीत मुख्यमंत्री डॉ. प्रमोद सावंत (CM Pramod Sawant) यांच्या साखळी मतदारसंघातून पुन्हा एकदा नगरपालिकेचे माजी नगराध्यक्ष धर्मेश सलगानी यांना उमेदवारी जाहीर केली आहे. आतापर्यंत काँग्रेस पक्षाने 26 उमेदवार (Candidate) जाहीर केले होते.

त्यापैकी 2उमेदवारांनी माघार घेतल्यामुळे त्यांचे 24 उमेदवार झाले आहेत. तर गोवा फॉरवर्ड (Goa Forward) पक्षाने 2, आम आदमी पक्षाने 30, तृणमूल काँग्रेसने 11रिव्होल्युशनरी गोवन्स 28उमेदवार जाहीर केले आहेत. आज जाहीर केलेल्या याद्यांमधून लक्षवेधी ठरले ते मुख्यमंत्र्यांच्या साखळी विधानसभा मतदारसंघांत काँग्रेसतर्फे धर्मेश सलगानी यांचे नाव. दुसरीकडे, गोवा फॉरवर्डचे नेते विजय सरदेसाई यांच्या विरोधात तृणमूलने खासदार लुईझीन फालेरो यांना उमेदवारी देत मोठे आव्हान उभे केले आहे.