Breast Cancer: महिलांमध्‍ये स्तनाच्‍या कर्करोगाचे प्रमाण दिवसेंदिवस वाढत आहे. मात्र समाधानाची बाब म्‍हणजे एक लाख महिलांची स्तन कर्करोग स्‍क्रिनिंग पूर्ण केलेले गोवा हे पहिले राज्य ठरले आहे. या एक लाख महिलांपैकी अडीच हजार महिलांमध्ये कर्करोगसदृश गाठी आढळल्या.

त्यांच्‍यातील 1070 महिलांना पुढील चाचणीसाठी पाठविण्यात आले असून आत्तापर्यंत 55 महिलांना स्तन कर्करोग असल्याचे स्‍पष्‍ट झाले आहे. ‘युई लाईफ सायन्स’च्या सीईओ गौरी नवलकर-गोडसे यांनी ‘गोमन्तक’शी बोलताना ही माहिती दिली.

या एक लाख महिलांची स्क्रिनिंग झाली नसती तर स्तन कर्करोग रुग्‍णांची संख्या निश्‍चितच वाढली असती. मग हे प्रमाण किती मोठ्या प्रमाणात वाढले असते हे सांगू शकत नाही. म्‍

हणूनच गोवा सरकार आणि आरोग्यमंत्री विश्‍वजीत राणे यांच्‍या सहकार्याने पार पडलेला हा उपक्रम महत्त्‍वपूर्ण आहे, असे गौरी नवलकर-गोडसे यांनी सांगितले.

‘युई लाईफ सायन्स’ ही राज्यात स्तन कर्करोग स्क्रिनिंग उपक्रमातील प्रमुख संघटना आहे. स्तन कर्करोगाची पहिल्या टप्‍प्‍यात माहिती मिळाल्यास केमो कमी होतो, केस गळत नाहीत व त्वचेवरही परिणाम होत नाही. सर्वसामान्य उपचारांप्रमाणे हे उपचार घेतले जाऊ शकतात, असे नवलकर यांनी सांगितले.

स्‍तन कर्करोगावरील सर्व उपचार मोफत

अगोदर स्‍तन कर्करोग हा 40 ते 45 वर्षे किंवा त्याहून अधिक वयाच्या महिलांमध्‍ये आढळायचा. परंतु आता तिशीतही तो आढळत असल्‍याने आम्ही 30 वर्षे वयोगटापासूनच्या महिलांची स्क्रिनिंग करत आहोत, असे गौरी नवलकर-गोडसे यांनी सांगितले. दुसरी महत्त्वाची गोष्‍ट म्‍हणजे गोव्‍यात स्‍तन कर्करोगावरील सर्व उपचार मोफत आहेत.