पणजी : सायबर गुन्हेगारांवर आणि आंतरराज्य वित्तीय फसवणूक करणाऱ्या रॅकेटवर झालेल्या कारवाईदरम्यान गोवा पोलिसांनी सात मुख्य संशयितांना अटक केली असून, २४ संशयितांना नोटिसा बजावल्या आहेत.

‘ऑपरेशन सायबर व्हिजिल’ या विशेष मोहिमेअंतर्गत गोवा पोलिसांनी देशातील ११ राज्यांमध्ये एकाच वेळी ही कारवाई केली. या छाप्यादरम्यान अनेक प्रकरणांमध्ये २ कोटी ५० लाख ६५ हजार ४०२ रुपये सायबर गुन्हेगारांनी लुटल्याचे उघड झाले.

गोवा सायबर क्राइम, उत्तर गोवा, दक्षिण गोवा, कुशावती जिल्हा पोलिस आणि गुन्हे शाखा यांच्या संयुक्त विद्यमाने ही विशेष मोहीम राबवण्यात आली होती. गोव्यात नोंदवलेल्या सुमारे ४० वेगवेगळ्या सायबर फसवणुकीच्या प्रकरणांशी या कारवाईचा थेट संबंध असल्याची माहिती पोलिसांनी दिली आहे.

सिंडिकेटशी काही संबंध आहे का?

आता पोलिसांनी सुमारे अडीच कोटी रुपयांच्या मोठ्या सायबर सिंडिकेटचा पर्दाफाश केला असला, तरी यात जप्त केलेली रक्कम किती आणि खर्च झालेली किती? आपल्या तक्रारीचा या सिंडिकेटशी काही संबंध आहे का? आणि मुख्य म्हणजे, गेलेले पैसे परत मिळतील का? असे अनेक प्रश्न पीडितांच्या मनात कायम आहेत.

नेटवर्क उद्ध्वस्त करण्यासाठी ४० पथके

सायबर गुन्हेगारांचे नेटवर्क उद्ध्वस्त करण्यासाठी गोवा पोलिसांनी ४० विशेष पथके तयार केली होती. या पथकांनी देशभरातील ११ राज्यांमधील ४० हून अधिक ठिकाणांवर एकाच वेळी छापे टाकले. यामध्ये पश्चिम बंगाल, राजस्थान, उत्तर प्रदेश, महाराष्ट्र, तमिळनाडू, तेलंगणा, दिल्ली, उत्तराखंड, केरळ, कर्नाटक आणि आसाम यांचा समावेश आहे.

भारतीय नागरिक सुरक्षा संहितेच्या कलम ३५(३) अंतर्गत २४ संशयितांना चौकशीसाठी नोटिसा बजावण्यात आल्या आहेत. संशयितांकडून डिजिटल पुरावे आणि गुन्ह्यात वापरलेली २१ इलेक्ट्रॉनिक साधने जप्त करण्यात आली असून, ती न्यायवैद्यक तपासणीसाठी पाठवण्यात आली आहेत.