Cash For Job Scam Goa

म्हापसा: तुमच्या पतीला सरकारी नोकरीला लावते, अशी थाप मारून तब्बल ४ लाख रुपये उकळल्याप्रकरणी कोलवाळ पोलिसांनी बायणा-वास्को येथील उमा पाटील हिला आज बुधवारी (ता. २७) अटक केली. याप्रकरणी नादोडा येथील ४४ वर्षीय महिला फिर्यादी आहेत.

ही फसवणुकीची घटना गेल्या ऑगस्ट २०२३ मध्ये घडली होती. तुझ्या पतीला कुठल्या तरी सरकारी खात्यात नोकरीला लावतोच, असे संशयित उमा हिने फिर्यादीला सांगितले होते. मात्र संशयिताने आपली फसवणूक केल्याचे लक्षात येताच फिर्यादीने पोलिस तक्रार दिली होती. कोलवाळ पोलिसांनी १४ नोव्हेंबरला याप्रकरणी गुन्हा नोंद केला होता.

मडगावात जोडप्याकडून १४.५० लाखांना गंडा

सरकारी नोकरी देण्याचे आमिष देऊन एका जोडप्याने आम्हाला साडेचौदा लाखांना गंडा घातल्याचे दोन महिलांनी मडगाव स्थानकात येऊन सांगितले.

यावेळी पोलिसांनी त्यांना जेथे घटना घडली आहे, तेथील पोलिस स्थानकात जाऊन तक्रार नोंदविण्यास सांगितले. संशयित म्हणून त्यांनी रोहित पै व त्याच्या बायकोने आम्हाला फसविल्याचे सांगितले. आमचे पैसे परत देण्यासाठी जो धनादेश दिला होता, तो वठलाच नाही. दरम्यान, रोहितचे आजारपणामुळे निधन झाले असून त्याची पत्नी आमचे पैसे देण्यास नकार देत असल्याचे या तक्रारदारांचे म्हणणे आहे.