गोव्यात वाढत्या गुन्हेगारी प्रकारांवर आळा घालण्यासाठी गोवा सरकार, पोलीस प्रशासन आणि अबकारी खाते नेहमीच सतर्क असते मात्र तरीही हे प्रकार कमी होण्याचे नाव घेत नाहीत. प्रामुख्याने ड्रग्स तस्करीच्या घटनांमुळे गोव्याचे नाव देशभरात खराब होत आहे.

यामध्ये परप्रांतीयांचा सहभाग जास्त असतो; मात्र आता अल्पवयीन मुलांचाही यामध्ये सहभाग असल्याचे प्रकार समोर येत आहेत. नुकतेच पोलिसांनी म्हापसा येथे छापा टाकून एकाला अटक केली आहे.

म्हापसा येथील डांगी कॉलनी येथे 19 वर्षीय तरुणाला ड्रग्स तस्करी प्रकरणी अमली पदार्थ विरोधी पथकाने ताब्यात घेतले आहे. संशयिताचे नाव अफनान घोरी असून त्याच्याकडून पोलिसांनी 1. 90 लाखांचे 18.40 ग्रॅम मेंटाफेटामाईन ड्रग्स जप्त करण्यात आले आहे.

संबंधित घटनेबाबत पोलीस पुढील तपास करत आहेत.

दरम्यान, गोव्यातून कर्नाटकात मद्य तस्करी करण्याचा प्रयत्नात असलेल्या एका ट्रक चालकाला बुधवारी रात्री अबकारी विभागाच्या अधिकाऱ्यांनी ताब्यात घेतले.

अनमोड तपासणी नाका येथे ही कारवाई करण्यात आली.