राजधानीत तीन दिवसांपूर्वी गार्सिया उद्यानाजवळील झाड अंगावर पडल्याने युवतीचा मृत्यू झाल्याच्या घटनेनंतर महानगरपालिका फारच गंभीर झाल्याचे दिसत आहे. महानगरपालिकेने दोन पथके झाडांच्या फांद्या कापण्यासाठी आणि धोकादायक झाडे हटविण्यासाठी नेमली आहेत.

सध्या प्राथमिक निरीक्षणानंतर महानगरपालिकेच्या यादीवर १४ झाडे धोकादायक, तर ९० झाडांच्या फांद्या हटवाव्या लागणार आहेत. त्यामुळे राजधानीतील हिरव्या आच्छादनाला (ग्रीन कव्हर) छेद जाणार असल्याचे स्पष्ट आहे.

राज्यभर पावसाने ५० दिवसांत इंचाची शंभरी पार केली आहे. विक्रमी पावसाबरोबर जोरदार सोसाट्याच्या वाऱ्यांमुळे झाडे पडणे, भूस्खलन, घर कोसळण्याच्या घटना घडल्या. राजधानीतही पाणी साचण्याचे प्रकार घडले, त्याशिवाय आल्तिनो, मध्यपणजी परिसरात झाडे कोसळण्याचे प्रकार घडले.

मध्य पणजीत गार्सिया उद्यानाजवळील पदपथावर असणारे गुलमोहराचे झाड पडल्याने त्याखाली सापडून युवतीचा मृत्यू झाला. त्यामुळे पणजी महानगरपालिकेची झोप उडाली. परंतु तत्पूर्वीच महानगरपालिकेने रस्त्याच्या बाजूच्या झाडांच्या फांद्या हटविण्याचे काम आल्तिनो परिसरात सुरू केले होते.

रविवारी ही घटना घडल्यानंतर महानगरपालिकेला धोकादायक झाडे आणि झाडांच्या धोकादायक फांद्या हटविण्याचे काम हाती घ्यावे लागले. महापौर रोहित मोन्सेरात यांनी सांगितले की, पणजी शहरात १४ झाडे धोकादायक असल्याचे केलेल्या पाहणीत आढळले.