म्हापसा: पेडे-म्हापसा येथे राष्ट्रीय महामार्गावर दुचाकी वाहनाने दिलेल्या धडकेत १२ वर्षीय मुलीचा दुर्दैवी मृत्यू झाला. हा अपघात आज (मंगळवारी) सायंकाळी सातच्या सुमारास घडला.

पोलिसांच्या माहितीनुसार, मृत मुलीचे नाव आकांक्षा बोरो असे आहे. ती इयत्ता सातवीत शिकत होती. आपल्या नातेवाईकांकडे रस्ता ओलांडून जात असताना हा अपघात घडला. तीन मुलींचा एक गट रस्ता ओलांडत होता. त्यावेळी आकांक्षा ही मागे राहिली.

त्यावेळी वेगाने आलेल्या दुचाकीस्वाराने तिला धडक दिली आणि त्याने घटनास्थळाहून दुचाकीसह त्वरित पलायन केले, असे प्रत्यक्षदर्शींनी सांगितले. जखमी अवस्थेत तिला जिल्हा इस्पितळात नेले; परंतु तेथील डॉक्टरांनी तिला मृत घोषित केले.

दुचाकी चालवणारा मुलगा १६ वर्षांचा असून पोलिसांनी त्याचे वडील शब्बीर कासीम शेख (वय ४८ वर्षे) यांच्यावर गुन्हा दाखल केला. पीडित मुलीचे कुटुंबीय मूळचे आसामचे आहेत. याप्रकरणी म्हापसा पोलिस अधिक तपास करत आहेत.