Dabolim Airport

नौदलाच्या आक्षेपानंतर दाबोळीतील फ्लाईट लँडिंग झोनजवळील ११ अवैध घरे आज एका कारवाईत पाडण्यात आली. ही कारवाई मुरगाव नियोजन विकास प्राधिकरणाने केली.

गोव्यातील अवैध बांधकामांविरोधात प्रशासनाने सर्वत्र मोठी मोहीम हाती घेतली असून त्यानुसार आज दाबोळीतील ‘फ्लाईट लँडिंग झोन’जवळील ११ घरांवर मुरगाव नियोजन विकास प्राधिकरणाने बुलडोझर फिरवला.

ही घरे गेल्या १० ते १५ वर्षापूर्वीची असून भारतीय नौदलाने (Indian Navy) या घरांच्या बांधकामावर १५ वर्षांपूर्वी आक्षेप घेतला होता हे प्रकरण न्यायप्रविष्ट होते. कारण ही घरे दाबोळी येथील फ्लाईट लँडिंग झोनजवळ म्हणजेच विमाने उड्डाणाच्या व उतरविण्याच्या क्षेत्राजवळील भागात होती.

आजच्या कारवाईने येथील नागरिकांत भीतीचे सावट पसरले आहे. गेली पंधरा वर्षे आपण या ठिकाणी घर बांधून वास्तव्यास आहे.

नौदलाचा आक्षेप होता, तर आम्हाला पंचायतीकडून घर बांधण्यास परवानगी का दिली? नळ, वीजजोडणी का दिली? असे असते तर आम्ही लाखो रुपये कर्ज काढून घर बांधले नसते.

आम्हाला ही नुकसान भरपाई कोण देणार? रात्रीचे दिवस करून मोलमजुरी करून आम्ही घरे उभी केली ते आम्ही आता मोडताना आमच्या उघड्या डोळ्यांनी पाहत आहोत अशी दुःखद प्रतिक्रिया येथील नागरिकांनी व्यक्त केली.