Arunachal Pradesh Vs Goa Cricket Match

पणजी: गोव्याच्या २३ वर्षाखालील क्रिकेट संघाने सलग तीन पराभवानंतर सोमवारी एकदिवसीय सामन्यांच्या स्पर्धेत पहिला विजय नोंदविला. त्यांनी ड गटातील लढतीत दुबळ्या अरुणाचल प्रदेशवर नऊ विकेट राखून सहज मात केली.

छत्तीसगडमधील भिलाई येथे झालेल्या सामन्यात गोव्याने नाणेफेक जिंकून अरुणाचल प्रदेशला प्रथम फलंदाजीचे आमंत्रण दिले. गोव्याच्या प्रभावी गोलंदाजीसमोर अरुणाचल प्रदेश डाव ९६ धावांत संपुष्टात आला. गोव्याचा फिरकी गोलंदाज शदाब खान याने ९.३ षटकात फक्त वीस धावा देताना पाच गडी बाद केले. याशिवाय अमित यादव व मनीष काकोडे यांनी प्रत्येकी दोन फलंदाज बाद केले.

विजयासाठीचे ९७ धावांचे आव्हान गोव्याने आरामात पार केले. त्यांनी १३.४ षटकात एक गडी गमावून आवश्यक धावा नोंदविल्या. गौरेश कांबळे यांनी ४५ धावा करताना देवनकुमार चित्तेम यांच्यासमवेत ६३ धावांची सलामी दिली. गौरेश बाद झाल्यानंतर देवनकुमार आणि आयुष वेर्लेकर यांनी विजयाची औपचारिकता पूर्ण केली.

संक्षिप्त धावफलक ः अरुणाचल प्रदेश ः ३६.३ षटकांत सर्वबाद ९६ (टिक ली ११, हर्ष यादव १४, हर्ष पांडे २७, शिवम प्रताप सिंग ४-०-१८-०, अमित यादव ७-२-२६-२, मनीष काकोडे १०-३-१५-२, शदाब खान ९.३-१-२०-५, यश कसवणकर ६-०-१३-१) पराभूत वि. गोवा ः १३.४ षटकांत १ बाद ९७ (गौरेश कांबळी ४५, देवनकुमार चित्तेम नाबाद ३५, आयुष वेर्लेकर नाबाद १४, मिंदू त्सेरिंग १-१६).