पणजी: गतविजेत्या स्पोर्टिंग क्लब द गोवा संघाने प्रोफेशनल लीग फुटबॉल स्पर्धेत एका गोलच्या पिछाडीवरून विजयाची नोंद केली. अखेरची नऊ मिनिटे दहा खेळाडूंसह खेळणाऱ्या चर्चिल ब्रदर्सला त्यांनी २-१ फरकाने हरविले. सामना म्हापसा येथील धुळेर स्टेडियमवर झाला.

ज्योबर्न कार्दोझ याने दहाव्या मिनिटास केलेल्या गोलमुळे चर्चिल ब्रदर्सने आघाडी घेतली. सामन्याच्या ५८व्या मिनिटास कुणाल कुंडईकरच्या गोलमुळे स्पोर्टिंग क्लबने बरोबरी साधली. नंतर ८३व्या मिनिटास बदली खेळाडू विक्रम व्यंकटचलम याच्या गोलमुळे स्पोर्टिंग क्लबपाशी आघाडी जमा झाली.

यावेळी कुणाल कुंडईकरचा फटक्यावर चेंडू विक्रमच्या पायाला चाटून गोलनेटमध्ये गेला. त्यापूर्वी ८१व्या मिनिटास सामन्यातील दुसऱ्या यलो कार्डमुळे ट्रिजॉय डायस याला रेड कार्डसह मैदान सोडावे लागले. त्यामुळे बाकी कालावधीत चर्चिल ब्रदर्सला दहा खेळाडूंसह खेळावे लागले. याचा लाभ स्पोर्टिंग क्लबने घेतला.

चर्चिल ब्रदर्सने सामन्याच्या सुरवातीसच जल्लोष केला. लुनमिन्लेन हाओकिप याने स्पोर्टिंगच्या बचावफळीत खिंडार पाडल्यानंतर गोल करण्याचे काम ज्योबर्न याने चोखपणे बजावले. तासाभराच्या खेळापर्यंत गतविजेते पिछाडीवर राहिले. उत्तरार्धात स्पोर्टिंगने गोलसाठी प्रयत्न केले, पण संधी हुकल्या. अखेरीस कुणालच्या डाव्या बगलेतील ताकदवान क्रॉस फटक्याने त्यांना बरोबरीसाधून दिली. .