Sporting Club de Goa Secures 3-0 Win Over Neroca FC in I-League 2

पणजी: स्पोर्टिंग क्लब द गोवा संघाने आय-लीग २ फुटबॉल स्पर्धेत घरच्या मैदानावर सलग दुसरा विजय नोंदविताना मंगळवारी इंफाळ-मणिपूर येथील नेरोका एफसीवर ३-० फरकाने मात केली. सामना एला-जुने गोवे येथील मैदानावर झाला.

स्पोर्टिंग क्लब द गोवाच्या विजयात डॉयल अल्वीस याने १५व्या, ज्योएल कुलासो याने २३व्या, तर न्गांगबाम नाओचा सिंग याने ४६व्या मिनिटास प्रत्येकी एक गोल केला. याच मैदानावर स्पोर्टिंग गोवाने मागील लढतीत ट्राऊ एफसीला १-० फरकाने पराभूत केले होते.

लागोपाठच्या दुसऱ्या आणि एकंदरीत तिसऱ्या विजयामुळे स्पोर्टिंग क्लब द गोवाचे आता सहा सामन्यांतून दहा गुण झाले असून ते चौथ्या क्रमांकावर आले आहेत. नेरोका एफसीला तिसरा पराभव पत्करावा लागला. त्यामुळे ते सात गुणांसह सातव्या स्थानी राहिले. स्पोर्टिंग गोवाचा पुढील सामना दोन मार्च रोजी केरळमधील (Kerala) मांजेरी येथील पय्यानाड स्टेडियमवर एसएटी तिरुर संघाविरुद्ध होईल.