पणजी: एफसी गोवाच्या आघाडीफळीतील प्रमुख खेळाडू इकेर ग्वॉर्रोचेना, भारताचा आंतरराष्ट्रीय बचावपटू संदेश झिंगन दुखापतीमुळे इंडियन सुपर लीग (आयएसएल) फुटबॉल स्पर्धेतील चारही सामने खेळू शकले नव्हते, त्यामुळे मुख्य प्रशिक्षक मानोलो मार्केझही चिंतित होते. आता दोघेही अनुभवी खेळाडू तंदुरुस्तीच्या दिशेने वाटचाल करत असून त्यामुळे संघालाही दिलासा मिळाला.

एफसी गोवा आणि गोवा पोलिस संघातील मैत्रीपूर्ण सामना बांबोळी येथील ॲथलेटिक स्टेडियमवर झाला. अपेक्षेनुसार एफसी गोवाने सामना ९-० अशा दणदणीत फरकाने जिंकला. आयएसएल स्पर्धेत चार गोल केलेला अल्बानियाचा आर्मांदो सादिकू याने हॅटट्रिक साधली. या लढतीत ग्वॉर्रोचेना व झिंगन दोघेही खेळले आणि त्यांनी मैदानावरील सुमारे तासाभराच्या उपस्थितीत छाप पाडली.

एफसी गोवाचा पुढील आयएसएल सामना १९ ऑक्टोबर रोजी फातोर्ड्यात मुंबई सिटीविरुद्ध होणार आहे. त्या लढतीत ग्वॉर्रोचेना व झिंगन खेळण्याची शक्यता बळावली आहे. स्पॅनिश खेळाडूने गोवा पोलिस संघाविरुद्ध तीन संधी निर्माण करताना एक गोलही नोंदविला. याव्यतिरिक्त ब्रायसन फर्नांडिस, उदांता सिंग, मुहम्मद नेमिल, बोर्हा हेर्रेरा व आयुष छेत्री यांनीही प्रत्येकी एक गोल केला.