पणजी: रणजी करंडक क्रिकेट स्पर्धेप्रमाणे २३ वर्षांखालील कर्नल सी. के. नायडू करंडक क्रिकेट स्पर्धाही २०२५-२६ मोसमात दोन टप्प्यात होणार आहे. एलिट अ गटातील गोव्याची मोहीम १६ ऑक्टोबरपासून सुरू होईल.

कर्नल सी. के. नायडू करंडक क्रिकेट स्पर्धेचा पहिला टप्पा ५ नोव्हेंबर रोजी संपेल, नंतर २३ जानेवारीपासून दुसऱ्या टप्प्यातील लढती होतील. एलिट गटात पहिल्या टप्प्यात तीन, तर दुसऱ्या टप्प्यात चार लढती नियोजित आहेत. २३ वर्षांखालील वयोगटातील स्टेट ए (एकदिवसीय) करंडक स्पर्धेला चार दिवसीय सामन्यांची स्पर्धा खंडित झाल्यानंतर ९ नोव्हेंबरपासून सुरवात होईल.

कर्नल सी. के. नायडू करंडक स्पर्धेत एलिट ए गटात झारखंड, गुजरात, मेघालय, बडोदा, पंजाब, केरळ व जम्मू-काश्मीर हे संघ गोव्याचे प्रतिस्पर्धी आहेत. सातपैकी तीन सामने गोव्याचा संघ घरच्या (होम) मैदानावर खेळेल. एकदिवसीय स्पर्धेत एलिट ब गटात ओडिशा, आसाम, गुजरात, झारखंड, आंध्र, जम्मू-काश्मीर, मुंबई हे संघ गोव्याचे प्रतिस्पर्धी आहेत.

या गटातील सर्व लढती ९ ते २१ नोव्हेंबर या कालावधीत बडोदा येथे खेळल्या जातील. गतमोसमात गोव्याची दोन्ही गटातील कामगिरी अपेक्षित नव्हती, दोन्ही स्पर्धांत प्रत्येकी एका विजयाची नोंद केली होती.

नियोजित वेळापत्रक: २३ वर्षांखालील कर्नल सी. के. नायडू करंडक, एलिट अ ः विरुद्ध झारखंड - १६ ते १९ ऑक्टोबर (अवे), विरुद्ध गुजरात - २६ ते २९ ऑक्टोबर (होम), विरुद्ध मेघालय - २ ते ५ नोव्हेंबर (अवे), विरुद्ध बडोदा - २३ ते २६ जानेवारी (होम), विरुद्ध पंजाब - ३० जानेवारी ते २ फेब्रुवारी (होम), विरुद्ध केरळ - ६ ते ९ फेब्रुवारी (अवे), विरुद्ध जम्मू-काश्मीर - १३ ते १६ फेब्रुवारी (अवे).

२३ वर्षांखालील लिस्ट ए करंडक, एलिट ब (स्थळ - बडोदा): विरुद्ध ओडिशा - ९ नोव्हेंबर, विरुद्ध आसाम - ११ नोव्हेंबर, विरुद्ध गुजरात - १३ नोव्हेंबर, विरुद्ध झारखंड - १५ नोव्हेंबर, विरुद्ध आंध्र - १७ नोव्हेंबर, विरुद्ध जम्मू-काश्मीर - १९ नोव्हेंबर, विरुद्ध मुंबई - २१ नोव्हेंबर.