पणजी: गोव्याची प्रतिभाशाली युवा जलतरणपटू पूर्वी नाईक राष्ट्रीय सबज्युनियर-ज्युनियर जलतरण स्पर्धेत मुलींच्या गट तीनमधील वेगवान जलतरणपटू ठरली. तिने ५० मीटर फ्रीस्टाईल शर्यत ३०.७० सेकंदात पूर्ण करून सुवर्णपदकाची कमाई केली. स्पर्धा ओडिशातील भुवनेश्वर येथे सुरू आहे.

पूर्वी हिचे हे स्पर्धेतील चौथे पदक ठरले. यापूर्वी तिने १०० मीटर फ्रीस्टाईल व ४०० मीटर फ्रीस्टाईलमध्ये रौप्य, तर २०० मीटर फ्रीस्टाईलमध्ये ब्राँझपदक जिंकले होते. पूर्वी ही कांपाल-पणजी येथील खेलो इंडिया राज्य उत्कृष्टता केंद्रातील जलतरण प्रशिक्षणार्थी आहे. तिला प्रशिक्षक टी. ए. सुजित यांचे मार्गदर्शन लाभत असून ती कुजिरा येथील मुष्टिफंड हायस्कूलची विद्यार्थिनी आहे.

पूर्वी हिने शुक्रवारी सकाळच्या सत्रात ५० मीटर फ्रीस्टाईलच्या पात्रता फेरीत ३०.९२ सेकंदासह अव्वल वेळ नोंदविली होती. मुख्य फेरीतही तिने तोच धडाका कायम राखताना आपलीच अगोदरची वेळ ०.२२ सेकंद फरकाने मागे टाकत सुवर्णपदकावर हक्क सांगितला.

कर्नाटकच्या दोन्ही जलतरणपटू तिच्या मागे राहिल्या. श्विटी सुवर्णा (३१.०८ सेकंद) हिला रौप्य, तर श्रेया पुजार हिला (३१.२८ सेकंद) हिला ब्राँझपदक मिळाले.