Professional League 2024 Sporting Club Vs FC Goa

पणजी: गतविजेत्या स्पोर्टिंग क्लब द गोवाने प्रोफेशनल लीग फुटबॉल स्पर्धेत गुरुवारी सलग तिसऱ्या विजयाची नोंद केली. त्यांनी एका गोलच्या पिछाडीवरून एफसी गोवा संघाला २-१ फरकाने नमविले.

सामना म्हापसा येथील धुळेर स्टेडियमवर झाला. सामन्याच्या दुसऱ्याच मिनिटास लेम्मेत तांगवा याने एफसी गोवास आघाडी मिळवून दिली. ४५व्या मिनिटास सेल्विन मिरांडा याने केलेल्या गोलमुळे स्पोर्टिंग क्लबने बरोबरी साधली.

उत्तरार्धाच्या सुरवातीस बदली खेळाडू या नात्याने मैदानात आलेल्या डॉयल अल्विस याच्या गोलमुळे ५८व्या मिनिटास स्पोर्टिंगच्या खाती महत्त्वपूर्ण आघाडी जमा झाली.

स्पर्धेत ओळीने तिसरा सामना जिंकल्यामुळे स्पोर्टिंग क्लबचे आता नऊ गुण झाले आहेत. एफसी गोवास दुसरा पराभव पत्करावा लागला. त्यामुळे चार लढतीनंतर त्यांचे सहा गुण कायम राहिले.