पणजी: आय-लीग फुटबॉल स्पर्धेत २०२४-२५ मोसमातील विजेतेपदाचा करंडक जिंकण्यासाठी जोरदार चुरस असून चार संघ दावेदार आहेत. साहजिकच रविवारी (ता. ६) होणाऱ्या तिन्ही लढती निर्णायक असतील.

श्रीनगर येथे रियल काश्मीर व चर्चिल ब्रदर्स यांच्यात, कोझिकोड येथे गोकुळम केरळा व धेंपो स्पोर्टस क्लब यांच्यात, तर पश्चिम बंगालमधील कल्याणी येथे इंटर काशी एफसी व राजस्थान युनायटेड यांच्यात लढत होईल. सर्व सामने संध्याकाळी चार वाजता सुरू होतील. विजेतेपदासाठी इच्छुक असलेल्या चार संघांत चर्चिल ब्रदर्सचे ३९, गोकुळम केरळाचे ३७, रियल काश्मीरचे ३६, तर इंटर काशीचे ३६ गुण आहेत.

सध्याच्या समीकरणानुसार, चर्चिल ब्रदर्सला सामना जिंकावा लागेल. त्यांचे ४२ गुण होतील व त्यांना बारा वर्षांनंतर तिसऱ्यांदा आय-लीग स्पर्धा जिंकणे शक्य होईल. बरोबरी झाल्यास त्यांचे ४० गुण होतील आणि बाकी निकालांकडे लक्ष ठेवावे लागेल. इंटर काशी एफसीने राजस्थान युनायटेडला पराभूत केल्यास त्यांचे ३९ गुण होतील.

नामधारी एफसीविरुद्धचा त्यांचा निकाल एआयएफएफ अपिल समितीच्या हाती आहे. या समितीने सुनावणीनंतर इंटर काशीला तीन गुण बहाल केल्यास त्यांचे ४२ गुण होतील. त्याचवेळी चर्चिल ब्रदर्स पराभूत झाल्यास इंटर काशी प्रथमच स्पर्धा जिंकू शकेल. गोकुळम केरळाने धेंपो क्लबला पराभूत केल्यास त्यांचे ४० गुण होतील. त्याचवेळी चर्चिल ब्रदर्स व इंटर काशी पराभूत होणे आवश्यक आहे, तसे झाल्यास गोकुळम केरळा तिसऱ्यांदा आय-लीग करंडक पटकावू शकेल.

शनिवारी झालेल्या लढतीनंतर ऐजॉल एफसी २०२५-२६ मध्ये सलग अकराव्यांदा आय-लीग स्पर्धेत खेळणार हे निश्चित झाले, तर स्पोर्टिंग क्लब बंगळूरच्या पदावनतीवर शिक्कामोर्तब झाले. घरच्या मैदानावर ऐजॉल एफसीने नामधारी एफसीवर ३-० असा देखणा विजय मिळविला.