I League Churchill Brothers Vs Bangalore Sporting Club

पणजी: घरच्या मैदानावर तळाच्या स्पोर्टिंग क्लब बंगळूरविरुद्ध विजय नोंदवून आय-लीग फुटबॉल स्पर्धेत अग्रस्थान मिळविण्याची चर्चिल ब्रदर्सला चांगली संधी होती, पण ती त्यांनी गमावली. १-१ अशा गोलबरोबरीमुळे त्यांना दोन गुणांचे नुकसान झाले आणि दुसऱ्या स्थानावर कायम राहावे लागले.

राय पंचायत मैदानावर सोमवारी दक्षिण आफ्रिकन वेड लेके याने ६१व्या मिनिटास चर्चिल ब्रदर्सला आघाडी मिळवून दिली. त्याचा हा स्पर्धेतील वैयक्तिक नववा गोल ठरला. नंतर ७२व्या मिनिटास वीस वर्षीय बचावपटू क्लॅरेन्स फर्नांडिसने शानदार गोल नोंदवून स्पोर्टिंग क्लब बंगळूरला बरोबरी साधून दिली.

चर्चिल ब्रदर्सने मिळालेल्या चांगल्या संधी साधल्या असत्या तर त्यांना पूर्ण तीन गुण मिळाले असते. त्यांची ही दुसरी बरोबरी ठरली, त्यामुळे १२ लढतीनंतर २३ गुणांसह ते दुसऱ्या क्रमांकावर राहिले. पहिल्या क्रमांकावरील नामधारी एफसी संघाच्या खाती २४ गुण आहेत.स्पोर्टिंग क्लब बंगळूरने अवे मैदानावर प्रथमच गुण मिळविला. त्यांचे आता १२ लढतीतून नऊ गुण झाले असून ते अकराव्या स्थानी आले आहेत.