पणजी: सीनियर महिला टी-20 क्रिकेट स्पर्धेत सुरवातीचे तीन सामने जिंकून गोव्याने दिमाखदार वाटचाल केली, मात्र नंतर सलग चार पराभवांसह मोहिमेची निराशाजनक सांगता झाली. सोमवारी बडोदा येथे अ गटातील अखेरच्या साखळी सामन्यात गुजरातने गोव्याला सहा विकेट राखून पराभूत केले.

दरम्यान, पहिल्यांदा फलंदाजी करणाऱ्या गोव्याची एकवेळ 6 बाद 24 धावा अशी दारुण स्थिती होती. तरन्नुम पठाण (नाबाद 39) व दिव्या नाईक (31) यांनी सातव्या विकेटसाठी 49 धावांची भागीदारी केल्यामुळे गोव्याला आव्हान उभारता आले. गुजरातने अखेरचे पाच चेंडू शिल्लक राखून आणि चार विकेट गमावून विजय नोंदवला. गोव्याने (Goa) तीन सामने जिंकले, तर चार पराभव पत्करले, त्यामुळे त्यांच्या खाती12 गुण जमा झाले. त्यांना आठ संघांत पाचवा क्रमांक मिळाला. आंध्रला पहिला, मुंबईला दुसरा, तमिळनाडूस तिसरा, ओडिशाला चौथा क्रमांक मिळाला.

संक्षिप्त धावफलक

गोवा: 20 षटकांत 7 बाद 95 (संजुला नाईक 5, श्रेया परब 2, पूर्वजा वेर्लेकर 6, तरन्नुम पठाण नाबाद 39, प्रीती यादव 0, पूर्वा भाईडकर 1, तेजस्विनी दुर्गड 5, दिव्या नाईक 31, तनया नाईक नाबाद 2, कृतिकाबेन 4-1-13-3, जयाबेन रामू 4-0-16-2) पराभूत वि. गुजरात: 19.1 षटकांत 4 बाद 99 (एस. राऊत 21, भावना गोपलानी नाबाद 39, पूर्वा भाईडकर 3-0-10-1, प्रीती यादव 4-0-24-1, तरन्नुम पठाण 4-0-18-2, सुनंदा येत्रेकर 2.1-0-16-0, श्रेया परब 4-0-17-0, तनया नाईक 2-0-11-0).