पणजी: गोमंतकीय इंटरनॅशनल मास्टर (आयएम) अमेय अवदी याच्यासाठी युरोप बुद्धिबळ दौरा यशस्वी ठरला. त्याने चेक प्रजासत्ताकातील चेस्के बुदयोव्हिस आयएम स्पर्धेत त्याने विजेतेपद पटकावले, तर याच देशातील टेप्लिस ओपन ‘ए’ स्पर्धेत तो आठव्या क्रमांकासह बक्षीस प्राप्त खेळाडू ठरला. फ्रान्समधील व्हॉजॅनी ओपन स्पर्धेत त्याला तृतीय क्रमांक मिळाला.

अमेय याला चेस्के बुदयोव्हिस स्पर्धेत चौथे मानांकन होते. दहा फेऱ्यांतून त्याने साडेसात गुणांसह विजेतेपद पटकावले. त्याने प्रतिस्पर्धी खेळाडूंपेक्षा दीड गुण जास्त नोंदविला. ऑस्ट्रियन फिडे मास्टर निको माराकोव्हिट्स याला सहा गुणांसह दुसरा, तर भारतीय फिडे मास्टर अपूर्व कांबळे याला साडेपाच गुणांसह तिसरा क्रमांक मिळाला.

अमेयने या स्पर्धेत चेक ग्रँडमास्टर रासिक वितेस्लाव, फिडे मास्टर ब्रुनो टॉप्नसिक, फिडे मास्टर डेव्हिड हाक, सायमन लँग, जेडन ली यांच्यावर मात केली. ग्रँडमास्टर पेत्र हाबा, कँडिडेट मास्टर याकुब ओसेलाक, निको माराकोव्हिट्स यांच्याविरुद्ध अमेयला बरोबरीचा अर्धा गुण मिळाला. यापूर्वी या स्पर्धेत त्याने २०२३ मध्ये ‘ओपन ए’ विभागात विजेतेपद मिळविले होते, तर २०२४ मध्ये तो संयुक्त अव्वल (टायब्रेकर गुणांत उपविजेता) ठरला होता.

चेक प्रजासत्ताकातील टेप्लिस ओपन ‘ए’ स्पर्धेत अमेय याने साडेसहा गुणांची नोंद केली. एकंदरीत तो संयुक्त दुसरा होता, मात्र टायब्रेकरमध्ये त्याला आठव्या क्रमांकांचे बक्षीस मिळाले. चेक प्रजासत्ताकाचा आयएम वाक्लाव्ह फिनेक व भारतीय आयएम सात्विक अडिगा यांचे समान साडेसात गुण झाले. टायब्रेकरमध्ये त्यांना अनुक्रमे विजेते व उपविजेतेपद मिळाले. या स्पर्धेत २८ देशांतील दीडशे बुद्धिबळपटू खेळले, त्यात ६१ खेळाडू किताबधारक होते.

भारतीय बुद्धिबळपटूंचे वर्चस्व

फ्रान्समधील व्हॉजॅनी ओपन बुद्धिबळ स्पर्धेत अमेयला तिसऱ्या क्रमांकाचे बक्षीस प्राप्त झाले. या स्पर्धेतील नऊ फेऱ्यांत त्याने साडेसहा गुण नोंदविले. मातब्बर बुद्धिबळपटूंचा समावेश असलेल्या या स्पर्धेत पहिले तिन्ही क्रमांक भारतीय बुद्धिबळपटूंना मिळाले. आयएम महंमद नुबेरशाह सात गुणांसह विजेता ठरला. आयएम अनुज श्रीवर्ती व अमेय यांचे समान साडेसहा गुण झाल्यानंतर टायब्रेकरमध्ये त्यांना अनुक्रमे दुसरा व तिसरा क्रमांक मिळाला. प्रमुख खेळाडूंत अमेयने अव्वल मानांकित ग्रँडमास्टर हिचाम हमदौची, आयएम अनुज श्रीवर्ती, फिडे मास्टर व्हर्जिल ब्रेयूल यांना बरोबरीत रोखले, तर आयएम सर्जिओ एस्टेरेमेरा, आयएम लुकास डी निकोलान्तियोनियो, रॉजर लब्रुयेरे, विल्यम गॉर्द, तिमोथे मारेयूआ यांच्यावर मात केले. या स्पर्धेत १३ देशांतील ५३ बुद्धिबळपटू सहभागी झाले होते.