पणजी : गोव्याचे विनोद फडके यांची भारतीय व्हेटरन क्रिकेट मंडळाच्या (बीव्हीसीआय) सचिवपदी निवड झाली. शुक्रवारी रात्री मंडळाची वार्षिक आमसभा वागातोर येथे झाली.

बीव्हीसीआय प्रभारी अध्यक्ष प्रवीण त्यागी यांच्या अध्यक्षतेखाली आमसभा झाली. यावेळी फडके यांच्या सचिवपदी नियुक्तीवर शिक्कामोर्तब झाले, तसेच महाराष्ट्राच्या सुधीर कुलकर्णी यांच्याकडे वरिष्ठ उपाध्यक्षपदाची जबाबदारी देण्यात आली. मंडळाच्या इतर पदाधिकाऱ्यांत केरळचे सेनन नायर खजिनदार, मुंबईचे मयांक खंडेवाल संयुक्त सचिव आहेत. गोव्याचे सुदेश प्रभुदेसाई यांना मंडळाचे सदस्य या नात्याने सामावून घेण्यात आले.

आमसभेत २०२४-२५ मोसमाच्या वेळापत्रकावर चर्चा झाली. २०२५ मधील इंडियन व्हेटरन्स प्रीमियर लीग (आयव्हीपीएल) स्पर्धा फेब्रुवारी महिन्यात घेण्याचे ठरले. या वर्षी सहा संघांची पहिली आयव्हीपीएल यशस्वीपणे घेतल्याबद्दल प्रवीण त्यागी यांचे अभिनंदन करण्यात आले. जानेवारी २०२५ मध्ये राष्ट्रीय व्हेटरन्स क्रिकेट स्पर्धा मध्य प्रदेशमध्ये घेण्यात येईल, तर त्यापूर्वी डिसेंबर २०२४ मध्ये विभागीय स्पर्धा होईल. तीन देशांची व्हेटरन्स क्रिकेट स्पर्धा घेण्याचेही आमसभेत ठरले.