Goa Cricket Stadium : येथील १९१९ स्पोर्ट्स क्रिकेट स्टेडियम हे येत्या काळात गोव्याच्या क्रिकेट नकाशावर मोठे केंद्र ठरण्याची चिन्हे दिसत आहेत. पुढील तीन वर्षांत या मैदानावर इंडियन प्रीमिअर लीग (आयपीएल) टी-२० सामने आयोजित करण्याचा मानस असल्याची माहिती स्टेडियमचे मालक तसेच चिखलीचे सरपंच कमलाप्रसाद यादव यांनी दिली.

आयपीएलसारख्या भव्य स्पर्धेसाठी २५ ते ३० हजार प्रेक्षक क्षमतेची आवश्यकता असते आणि ती वाढवण्यासाठी आवश्यक पायाभूत सुविधा उभारण्याची प्रक्रिया हाती घेतली जाईल, असेही त्यांनी स्पष्ट केले. सध्या या स्टेडियमवर सुरू असलेल्या ‘वर्ल्ड लेजंड प्रो टी-२० लीग’ मुळे गोव्यात क्रीडाविश्वासोबतच आर्थिक हालचालींनाही चालना मिळाली आहे.

भारतासह विविध देशांतील दिग्गज क्रिकेटपटूंच्या उपस्थितीमुळे स्थानिक व्यवसाय, पर्यटन आणि रोजगार संधींमध्ये वाढ झाल्याचे यादव यांनी सांगितले. भविष्यातही राष्ट्रीय आणि आंतरराष्ट्रीय दर्जाच्या अनेक स्पर्धा येथे आयोजित करण्याचा निर्धार त्यांनी व्यक्त केला.

यासोबतच ‘वूमन प्रीमिअर लीग टी-२०’ सामने गोव्यात घेण्यासाठीही हालचाली सुरू करण्यात येणार आहेत. युवा खेळाडूंना घडवण्यासाठी काही महिन्यांपूर्वी मुलांसाठी मोफत क्रिकेट प्रशिक्षण शिबिर राबवण्यात आले होते, ज्यामध्ये सुमारे ८० मुलांनी सहभाग घेतला. पुढील सहा महिन्यांत मोफत प्रशिक्षण उपक्रमांसह युवा क्रिकेट अकादमी स्थापन करण्याचे नियोजन आहे.

गोवा सरकार आणि गोवा क्रिकेट अकादमीकडून मिळणाऱ्या सहकार्यामुळे हे उद्दिष्ट गाठणे शक्य होईल, असा विश्वासही त्यांनी व्यक्त केला. भविष्यात गोव्याचा स्वतंत्र आयपीएल आणि वूमन प्रीमिअर लीग संघ असावा, हे आपले स्वप्न असून त्यासाठी स्थानिक उद्योजकांनी पुढाकार घ्यावा, असे आवाहन यादव यांनी केले.