पणजी: गोव्याच्या २३ वर्षांखालील क्रिकेट संघाच्या बाकी लढतीत १९ वर्षांखालील कुचबिहार करंडक स्पर्धेत सफल ठरलेल्या नवोदितांना संधी देण्याचे गोवा क्रिकेट असोसिएशनने (जीसीए) ठरविले आहे. कर्नल सी. के. नायडू करंडक स्पर्धेतील मोहिमेत चार लढती बाकी आहेत.

गोव्याचा एलिट अ गटातील चौथा सामना २३ जानेवारीपासून सांगे येथे बडोद्याविरुद्ध होईल. त्यानंतर याच ठिकाणी ३० जानेवारीपासून पंजाबविरुद्ध चार दिवसीय सामना खेळला जाईल. गटातील अखेरचे दोन्ही सामने गोव्याचा संघ अवे मैदानावर खेळेल.

६ फेब्रुवारीपासून त्रिवेंद्रम येथे केरळविरुद्ध, तर १३ फेब्रुवारीपासून जम्मू येथे जम्मू-काश्मीरविरुद्ध सामना खेळला जाईल. सध्या गोव्याचे तीन सामन्यांतून १४ गुण झाले असून एक अनिर्णित, एक पराभव व एक रद्द निकाल अशी कामगिरी आहे.

बडोदाविरुद्धच्या सामन्यासाठी १९ वर्षांखालील संघातील काही खेळाडूंना संधी मिळेल. त्यादृष्टीने संघ निवड समितीच्या बैठकीत सविस्तर चर्चा झाली. फलंदाजी आणि गोलंदाजीत नव्या चेहऱ्यांना सामावून घेतले जाईल.

१९ वर्षांखालील वयोगटातील संघाची चार दिवसीय, तसेच एकदिवसीय स्पर्धेतील मोहीम संपली असून या वयोगटातील काही खेळाडूंची आता २३ वर्षांखालील वयोगटात चाचपणी होईल. गोव्याने कुचबिहार करंडक स्पर्धेत उपांत्यपूर्व फेरीपर्यंत मजल मारली होती. या लढतीत त्यांना मध्य प्रदेशने डावाने पराभूत केले होते.

कर्नल सी. के. नायडू करंडक क्रिकेट स्पर्धेत ऑक्टोबर-नोव्हेंबर या कालावधीत गोव्याचा संघ तीन सामने खेळला. झारखंडविरुद्ध जमशेदपूर येथे त्यांना डाव व ११३ धावांनी पराभव पत्करावा लागला. पणजी जिमखान्यावरील गुजरातविरुद्धचा सामना पावसामुळे एकही चेंडू न टाकता रद्द झाला, तर मेघालयाविरुद्ध शिलाँग येथील सामना अनिर्णित राहिला.