पणजी: पंजाबविरुद्धच्या कर्नल सी. के. नायडू करंडक क्रिकेट स्पर्धेत सांगे येथे घरच्या मैदानावर अवघ्या अडीच दिवसांतच दारुण पराभव पत्करलेल्या गोव्याच्या २३ वर्षांखालील संघात मोठे बदल करण्यात आले आहेत. १९ वर्षीय अष्टपैलू यश कसवणकर केरळविरुद्धच्या आगामी लढतीत संघाचे नेतृत्व करेल.

पंजाबने पहिल्या डावात ५ बाद ५३३ घोषित अशी मोठी धावसंख्या उभारल्यानंतर गोव्याला अनुक्रमे ९२ व १४५ धावाच करता आल्या. या लढतीतून गोव्याला गोलंदाजीतील फक्त एकच गुण मिळाला होता. गोवा क्रिकेट असोसिएशनच्या निवड समितीने अतिशय खराब कामगिरीची गंभीर दखल घेत आणि भविष्याचा विचार करून २३ वर्षांखालील संघात १९ वर्षांखालील संघातील सफल खेळाडूंना संधी दिली आहे.

मागील पाच लढतीत गोव्याचे नेतृत्व केलेला फलंदाज आर्यन नार्वेकर यालाही संघातील स्थान राखता आलेले नाही. गोवा व केरळ यांच्यातील एलिट अ गट चार दिवसीय सामना सहा फेब्रुवारीपासून तिरुअनंतपुरम येथे खेळला जाईल.

गोव्याने स्पर्धेतील पाच लढतीत तीन पराभव पत्करले आहेत. एक लढत अनिर्णित राहिली असून एक सामना पावसामुळे रद्द करण्यात आला होता. कर्णधारपदी निवड करण्यात आलेल्या यश याने गतआठवड्यात केरळविरुद्ध गोव्याच्या रणजी करंडक संघात पदार्पण केले होते, सीनियर गटातील पहिल्याच डावात त्याने अर्धशतक नोंदविण्याची किमया साधली होती.

संघ असा ः यश कसवणकर (कर्णधार), बन्सिल पंड्या, रिजुल पंड्या, शंतनू नेवगी, कौशल हट्टंगडी, दिशांक मिस्कीन, जीवनकुमार चित्तेम, अनुज यादव, चिगुरुपती व्यंकट, समर्थ राणे, शिवेन बोरकर, कौस्तुभ पिंगुळकर, नित्यय कुंकळकर, शार्दुल शेट, विराज नाईक, मिहीर गावडे, सुजय नाईक.