पणजी: गोव्याच्या १९ वर्षांखालील क्रिकेट संघाने पुदुचेरी येथील स्पर्धेत शुक्रवारी रोमहर्षक विजय नोंदविला. कमी धावसंख्येच्या लढतीत त्यांनी हिमाचल प्रदेशला दोन विकेट राखून नमविले.

पुदुचेरी क्रिकेट असोसिएशनच्या १९ वर्षांखालील आंतरराज्य एकदिवसीय करंडक स्पर्धेत गोव्याचा ही तीन सामन्यांतील दुसरा विजय ठरला. हिमाचल प्रदेशचा डाव ९५ धावांत गुंडाळल्यानंतर गोव्याची आठ बाद ६२ अशी घसरगुंडी उडाली होती.

आठव्या क्रमांकावरील मिहीर कुडाळकर याने ३७ धावांची महत्त्वपूर्ण खेळी करताना संघाला विजय मिळवून दिला. सामन्याचा मानकरी ठरलेल्या मिहीर याने २५ चेंडूंतील खेळीत एक चौकार व पाच षटकार मारले.

त्यापूर्वी, डावखुरा गोविंद सावळ (३-३९) व वेदांत डब्राल (४-४९) या वेगवान गोलंदाजांनी, तसेच ऑफस्पिनर मिहीर कुडाळकर (३-७) यांनी हिमाचल प्रदेशला शंभर धावांच्या आत गारद करण्यात मोलाचा वाटा उचलला.

संक्षिप्त धावफलक

हिमाचल प्रदेश ः १९.४ षटकांत सर्वबाद ९५ (जपनीत सिंग १७, गोविंद सावळ ७.४-१-३९-३, वेदांत डब्राल ८-०-४९-४, मिहीर कुडाळकर ४-२-७-३) पराभूत वि. गोवा ः १९ षटकांत ८ बाद ९६ (आदित्य कोटा १२, विनीत कामत ३, आफ्रिदसाब राजक्कनावर १, आराध्य गोयल ४, मोहित यादव १७, वेदांत डब्राल ७, विस्मय फळगावकर ४, मिहीर कुडाळकर नाबाद ३७, गोविंद सावळ ०, जय कांगुरी नाबाद १, अंश धिमन २-१५, नौनीहाल ४-३६).