पणजी: गोवा क्रिकेट असोसिएशनच्या प्रीमियर लीग क्रिकेट स्पर्धेत पर्वरी येथील जीसीए अकादमी मैदानावर तीन दिवसीय सामन्यात बुधवारी पहिल्या दिवशी तब्बल २० गडी बाद झाले. त्यात धेंपो क्रिकेट क्लबने पणजी जिमखान्यावर पहिल्या डावात १३ धावांची आघाडी प्राप्त केली.

धेंपो क्रिकेट क्लबचा पहिला डाव १६४ धावांत गुंडाळल्यानंतर पणजी जिमखान्याचा डाव १५१ धावांत संपुष्टात आला. पणजी जिमखान्याने अगोदरच स्पर्धेची अंतिम फेरी गाठली असून त्यांना आव्हान देण्यासाठी धेंपो क्लबसाठी सामना महत्त्वाचा आहे.

मडगाव क्रिकेट क्लबच्या डॉ. राजेंद्र प्रसाद स्टेडियमवर पहिल्या दिवशी एमसीसी संघाचा डाव १७० धावांत आटोपल्यानंतर चौगुले क्लबने खेळ थांबला तेव्हा २ बाद ७५ धावा केल्या होत्या.

संक्षिप्त धावफलक

धेंपो क्रिकेट क्लब, पहिला डाव: ३७.२ षटकांत सर्वबाद १६४ (गौरेश कांबळी ४३, समर दुभाषी २२, निनाद राठवा ४६, तनय त्यागराजन ४-४९, राहुल मेहता ४-४५) व दुसरा डाव ः १ षटकात बिनबाद ० विरुद्ध पणजी जिमखाना, पहिला डाव ः ४६.१ षटकांत सर्वबाद १५१ (सुमीत घाडीगावकर २१, कश्यप बखले २१, तनय त्यागराजन ४३, सागर उदेशी २-५६, मोहित रेडकर ४-४३, निनाद राठवा ४-५०).

एमसीसी, पहिला डाव: ६४ षटकांत सर्वबाद १७० (शंतनू नेवगी ४०, ईशान गडेकर ५३, अभिनव तेज राणा २४, दर्शन मिसाळ ३-५७, महेश पिठिया २-६२, समर्थ राणे २-२०) विरुद्ध चौगुले स्पोर्टस क्लब, पहिला डाव ः २६ षटकांत २ बाद ७५ (आर्यन नार्वेकर ४३, रिजुल पाठक २३).

सनथ, स्नेहलची शानदार शतके

कांपाल येथील पणजी जिमखान्याच्या भाऊसाहेब बांदोडकर मैदानावर सनथ नेवगी (१०९ धावा, ९० चेंडू, १६ चौकार, ५ षटकार) व कर्णधार स्नेहल कवठणकर (नाबाद १०१ धावा, १९१ चेंडू, १० चौकार) यांना शानदार शतके ठोकली.

त्यामुळे साळगावकर क्रिकेट क्लबने जीनो स्पोर्टस क्लबविरुद्ध पहिल्या दिवसअखेर पहिल्या डावातील ८८ षटकांत ४ बाद ३७९ अशी सुस्थिती गाठली. याशिवाय आदित्य सूर्यवंशी (३६), कुवर पाठक (३९), नितीन तन्वर (६४) व यश कसवणकर (नाबाद २२) यांनीही उपयुक्त योगदान दिले. जीनो क्लबच्या सिद्धेश वीर याने ७८ धावांत ३ गडी बाद केले.