Footbal I League 2024 Churchill Brothers Vs Sreenidi Deccan

पणजी: आय-लीग फुटबॉल स्पर्धेत रविवारी हैदराबाद येथे डेक्कन श्रीनिदी संघाने २-१ अशा फरकाने पूर्ण तीन गुण प्राप्त केले, त्यामुळे गोव्याच्या चर्चिल ब्रदर्सची स्पर्धेतील पहिल्या विजयाची प्रतीक्षा लांबली.

फैझल शायेस्तेह याने २३ व्या थेट फ्रीकिवर पहिला गोल केला. नंतर अँजेल गोन्झालेझ याने ७३ व्या मिनिटास अगदी जवळून गोल केला. त्यामुळे श्रीनिदी डेक्कनपाशी दोन गोलची मजबूत आघाडी जमा झाली. स्पर्धेतील पहिल्या विजयाची नोंद केली.

मागील लढतीत त्यांना घरच्या मैदानावर गोकुळम केरळाविरुद्ध ३-२ फरकाने निसटता पराभव पत्करावा लागला होता. श्रीनिदी डेक्कनचे आता दोन लढतीनंतर तीन गुण झाले आहेत. आय-लीग फुटबॉल स्पर्धेत चर्चिल ब्रदर्सविरुद्धच्या सात सामन्यांतील श्रीनिदी डेक्कनचा हा पाचवा विजय ठरला. अन्य दोन लढतीत बरोबरीत राहिल्या आहेत.

चर्चिल ब्रदर्सची पिछाडी ९०+१ व्या मिनिटास लामगौलेन सेमखोलून याने एका गोलने कमी केली. पहिल्या लढतीत शिलाँग लाजाँगविरुद्ध २-२ अशी गोलबरोबरी नोंदविलेल्या माजी विजेत्यांचा दोन लढतीनंतर एक गुण कायम आहे. चर्चिल ब्रदर्सचा स्पर्धेतील पुढील सामना चार डिसेंबर रोजी बंगळूर येथे स्पोर्टिंग क्लब बंगळूरविरुद्ध होईल.