पणजी: इंडियन सुपर लीग (आयएसएल) फुटबॉल स्पर्धेतील अपराजित मालिका कायम राखताना एफसी गोवाने सलग दुसरा विजय नोंदविला, पण सामन्यावर वर्चस्व राखूनही स्पोर्टिंग क्लब दिल्लीविरुद्ध १-० अशा निसटत्या फरकाने जिंकल्याची सल राहिली.

फातोर्डा येथील पंडित जवाहरलाल नेहरू स्टेडियमवर गुरुवारी झालेल्या लढतीत सर्बियन देयान द्राझिच याने ४३व्या मिनिटास केलेला गोल निर्णायक ठरला, मात्र त्यानेच ६०व्या मिनिटास पेनल्टी फटका क्रॉसबारवरून मारल्यामुळे एफसी गोवाचा विजय एका गोलपुरता मर्यादित राहिला.

एफसी गोवाने मागील लढतीत मोहम्नेडन स्पोर्टिंगला दोन गोलने हरविले होते. एफसी गोवाचे आता तीन सामन्यांतून दोन विजय व एका बरोबरीसह सात गुण झाले आहेत. ते आता अव्वल बनले आहेत. त्यांचा पुढील सामना पाच मार्च रोजी ईस्ट बंगालविरुद्ध कोलकाता येथे खेळला जाईल.

स्पोर्टिंग क्लब दिल्लीला सलग तिसऱ्या लढतीत पराभव पत्करावा लागला. त्यामुळे ते अजूनही शून्य गुणांसह तळाच्या चौदाव्या स्थानी आहेत.

विश्रांतीला दोन मिनिटे बाकी असताना आकाश संगवान याच्या लाजवाब क्रॉस पासवर देयान याने बॉक्समधे घसरत उजव्या पायाने चेंडूला योग्य दिशा दाखविली. यावेळी गोलरक्षक नोरा फर्नांडिस पूर्णपणे चकला. खेळातील तासाभरात एफसी गोवास मोसमातील तिसरा पेनल्टी फटका मिळाला. स्पोर्टिंग क्लब दिल्लीच्या खेळाडूने यावेळी गोलक्षेत्रात चेंडू हाताळला होता.