पणजी : एफसी गोवा संघासाठी गोल नोंदविण्यासाठीच स्पॅनिश आघाडीपटू हावियर सिव्हेरियो याला करारबद्ध केले असून तो अपेक्षापूर्ती नक्कीच करेल, असा विश्वास या संघाचे मुख्य प्रशिक्षक मानोलो मार्केझ यांनी मंगळवारी व्यक्त केला.

आगामी नव्या मोसमासाठी एफसी गोवाने २७ वर्षीय सिव्हेरियो याला करारबद्ध केले आहे. स्पेनमधील सांताक्रूझ द टेनिरिफे येथे जन्मलेला खेळाडू २०२१ पासून इंडियन सुपर लीग (आयएसएल) स्पर्धेत खेळत आहे.

या कालावधीत हैदराबाद एफसी, ईस्ट बंगाल, जमशेदपूर एफसी या संघांचे प्रतिनिधित्व करताना सिव्हेरियो याने एकत्रित ३१ गोल नोंदविले आहेत. तो संघात असताना हैदराबाद एफसीने आयएसएल करंडक, तर ईस्ट बंगालने २०२४ सुपर कपचे विजेतेपद मिळविले होते.

सिव्हेरियो याच्या उपयुक्ततेविषयी मार्केझ यांनी सांगितले, की ‘हावियर हमखास गोल नोंदविणारा आहे. आतापर्यंत खेळलेल्या सर्व संघांतर्फे त्याने गोल केले आहेत.

भारतात खेळण्याचा त्याच्यापाशी खूप अनुभव जमा आहे. यापूर्वी (स्पेनमधील) लास पाल्मास, तसेच हैदराबाद एफसी संघात असताना तो माझ्यासोबत होता, तेव्हा आम्ही विजेतेपद मिळविले. आता तो याच कामगिरीसाठी एफसी गोवा संघात आला आहे.

आयएसएलमध्ये चेंडूस उत्कृष्ट हेडिंग साधणाऱ्यांत तो सर्वोत्तम ठरतो. अप्रतिम संघभावना जपणारा हा खेळाडू या मोसमात संघासाठी निश्चितच खूपच उपयुक्त ठरेल.’ एफसी गोवा हा एक उत्कृष्ट संघ असल्याने त्यांच्याशी करार करण्याचा निर्णय घेणे आपल्यासाठी सोपे ठरल्याचे सिव्हेरियो याने नमूद केले.