पणजी: एफसी गोवा संघाने सलग दुसऱ्या विजयासह १३३व्या ड्युरँड कप फुटबॉल स्पर्धेच्या ‘फ’ गटात अव्वल स्थान मिळविले. शिलाँग येथे गुरुवारी त्यांनी नेपाळच्या त्रिभुवन आर्मी एफसी संघाला २-१ फरकाने नमविले.

लाल्थांगलियाना याने सामन्याच्या पहिल्याच मिनिटास एफसी गोवास आघाडी मिळवून दिली. ५०व्या मिनिटास सिटरॉय कार्व्हालो याच्या गोलमुळे एफसी गोवाची आघाडी मजबूत झाली, मात्र ६६व्या मिनिटास बसंत जिम्बा याच्या गोलमुळे नेपाळमधील संघाची पिछाडी एका गोलने कमी झाली.

अगोदरच्या लढतीत एफसी गोवाने रंगदाजिएद युनायटेडवर ४-३ फरकाने मात केली होती. त्रिभुवन आर्मी संघाला सलग दुसरा पराभव पत्करावा लागला. इस्त्राईल गुरुंग यांच्या मार्गदर्शनाखालील नवोदित खेळाडू असलेल्या एफसी गोवा संघाचा गटसाखळी फेरीतील अखेरचा सामना १७ ऑगस्ट रोजी शिलाँग लाजाँग एफसीविरुद्ध होईल. एफसी गोवास बाद फेरीसाठी त्या लढतीत बरोबरीचा एक गुण पुरेसा असेल. शिलाँग लाजाँगचे एका लढतीतून तीन गुण आहेत. त्यांनी त्रिभुवन आर्मीला एका गोलने हरविले होते.